आसाम पूरग्रस्तांना आमिरकडून २५ लाखांची मदत

या परिस्थितीबद्दल बोलताना आमिर म्हणाला की, ‘आसाम आणि गुजरातच्या अनेक भागांमध्ये पूरजन्य परिस्थिती निर्माण झाली आहे. आपले बांधव तिकडे अडकले आहेत. या पुरात अनेक मृत्यूमुखीही पडले. एकीकडे जीवितहानी होत असताना वित्तहानीलाही आपल्याला सामोरे जावे लागत आहे. निसर्गासमोर तर आपण काहीही करू शकत नाही. पण तिथे राहणाऱ्यांना आपण मदत मात्र नक्कीच करु शकतो. मी त्यांना मदत करणारच आहे, तुम्हीही करा,’ असा संदेश आमिरने त्याच्या ट्विटर अकाऊंटवरून शेअर केला.

दिलेला शब्द पाळण्यासाठी आमिर खान ओळखला जातो. आमिरने पूरग्रस्तांच्या मदतीसाठी आसाम सरकारला २५ लाख रुपये दिले. आसाममध्ये निसर्गाच्या या माऱ्यामुळे आतापर्यंत ९० जणांनी आपले प्राण गमावले असून अनेकांच्या डोक्यावरचे छप्पर उडाले आहे.
आसामचे मुख्यमंत्री सरबनंदा सोनोवाल यांनी ट्विट करून आमिरचे आभार मानले. सोनोवाल यांनी लिहिले की, ‘आमिर खान प्रोडक्शन प्रायव्हेट लिमिटेड’च्या वतीने आसामच्या जनतेसाठी केलेल्या मदतीसाठी आमिर तुझे खूप आभार.’