अभिनेता अंकित मोहनने फर्जंद या चित्रपटातून मराठी चित्रपटसृष्टीत पदार्पण केले. अंकित हा अमराठी असून दिल्लीमधील चांदनी चौकात तो लहानाचा मोठा झाला. दिल्लीवरून २००६ मध्ये अंकित मोहन ‘रोडीज’शोमध्ये सहभागी होण्यासाठी मुंबईत आला होता. मात्र, एका अनोळखी शहरात स्वत:ची एक वेगळी ओळख बनवणे सोपे नव्हते. जीवनात कसा संघर्ष केला याविषयी नुकत्याच दिलेल्या मुलाखतीत अंकित मोहनने खुलासा केला आहे.
अंकित मोहन ‘राजश्री’ मराठीला दिलेल्या मुलाखतीत म्हणाला, “२००६ मध्ये मी मुंबईत आलो. तेव्हा मी रोडीजमध्ये सहभागी झालो होतो, राहण्यासाठी घर नसल्याने एका बॅगेमध्ये सर्व सामान घेऊन इकडून तिकडे फिरायचो…वेळेप्रसंगी कुठेही राहायचो तो काळ कठीण होता. खिशात पैसे नसताना मी गुरुद्वारामध्ये जाऊन लंगर खाऊन पोट भरले आहे. अगदी उपाशी पोटी सुद्धा कामे केली आहेत. मी आयुष्यात खूप चढ-उतार अनुभवले आहेत.”
अंकित पुढे म्हणाला, “एका खोलीत आम्ही ७ ते ८ जण राहत होतो, सगळे स्वत:च्या कामात व्यग्र असायचे. अकाऊंटमध्ये मोजकेच पैसे होते, हातात काम नव्हते, २० रुपयांची तिकीट काढून मी बसने दिवसभर प्रवास करायचो, कोणीही गॉडफादर नसल्यामुळे ऑडिशन्समध्ये यश मिळत नव्हते. या शहराने मला प्रत्येक गोष्ट शिकवली पण, मी कधीच हरलो नाही. मुंबईत आल्यावर तब्बल ३ ते ४ वर्षांनी मला चांगले काम मिळाले. पहिला चेक मिळाल्यावर मी दिल्लीला गेलो होतो. तेव्हा माझ्या आई-वडिलांसाठी मी एसी खरेदी केला होता. अशा सगळ्या घटना आयुष्यात घडत गेल्या…मी शिकत गेलो आणि आज मी इथवर पोहोचलो आहे.”
दरम्यान, अंकित मोहनने फर्जंद चित्रपटात साकारलेल्या कोंडाजी फर्जंद भूमिकेला प्रेक्षकांनी भरभरून प्रतिसाद दिला. लवकरच अंकित पुन्हा एकदा छत्रपती शिवाजी महाराजांवर आधारित ‘रामशेज’ आणि ‘मुरारबाजी’ या चित्रपटातून मोठ्या पडद्यावर झळकणार आहे.
