अभिनेत्री प्राजक्ता माळी सोशल मीडियावर फारच सक्रिय असते. आपला दिनक्रम, चित्रपट, कुटुंबाबाबत ती सोशल मीडियाच्या माध्यमातून व्यक्त होताना दिसते. चाहत्यांनी संवाद साधण्याचा हा तिचा अनोखा फंडा आहे. प्राजक्ता सुत्रसंचालन करत असलेल्या ‘महाराष्ट्राची हास्यजत्रा’ या कार्यक्रमाने काही काळासाठी ब्रेक घेतला होता. आता पुन्हा हा कार्यक्रम नव्या जोमाने सुरु झाला आहे. सध्या आपण लंडनला असल्याचं प्राजक्ताने फोटो पोस्ट करत सांगितलं होतं.
पण ती लंडनला का गेली? यामागचं कारण आता समोर आलं आहे. अभिनेता संकर्षण कऱ्हाडेबरोबर प्राजक्ता लंडनला गेली असल्याचं तिने सांगितलं. आता प्राजक्ताने एक नवी पोस्ट आणि फोटो शेअर करत परदेशात जाण्यामागचं कारण सांगितलं आहे. एका नव्या मराठी चित्रपटासाठी प्राजक्ताच्या नावाची वर्णी लागली आहे. याच चित्रपटाच्या चित्रीकरणासाठी ती लंडनला पोहोचली आहे.
ती फोटो शेअर करत म्हणाली, “हो शुभारंभ हा शुभारंभ मंगल बेला आयी. लंडनमध्ये चित्रपटाचे चित्रीकरण सुरु. जवळपास अर्धी मराठी चित्रपटसृष्टी लंडनला येऊन चित्रपटांचं चित्रीकरण करून गेली. मलाही हा अनुभव घ्यायचा होता. ऋषिकेश जोशी, नितीन वैद्य सरांचे मनापासून आभार. पण यादरम्यान माझा कार्यक्रम ‘महाराष्ट्राची हास्यजत्रा’ पाहायला विसरु नका.”
प्राजक्ता वैभव तत्त्ववादी, संकर्षण कऱ्हाडे या कलाकारांबरोबर आगामी मराठी चित्रपटामध्ये काम करताना दिसणार आहे. या चित्रपटाचं नाव, चित्रपटामधील प्राजक्ताची भूमिका याबाबत लवकरच घोषणा करण्यात येईल. प्राजक्ता सध्या मराठी चित्रपटांमध्येही उत्तमोत्तम भूमिका साकारताना दिसत आहे. काही दिवसांपूर्वीच तिचा ‘वाय’ चित्रपट प्रदर्शित झाला.
