स्वत:ची कार असावी असं अनेकांचं स्वप्न असतं. पण हे स्वप्न करिअरच्या सुरूवातीस साकार होणं हे फार अवघड आहे. अभिनेत्री सानिका भोईटे हिने तिच्या मेहनतीच्या बळावर अवघ्या २२ व्या वर्षी तिच्या आयुष्यातील पहिली कार खरेदी केली आहे. सानिकाने गेल्यावर्षी सोशल मीडियावर एक व्हिडीओ शेअर केला होता, त्यात तिने आईला विचारलं, ‘आई तुला यावर्षी माझ्याकडून कायं हवं’. आईने सांगितलं, ‘तू एक ४ व्हिलर खरेदी कर’ आणि सानिकाने तिच्या आईचं स्वप्न त्याचवर्षाच्या अखेरीस पूर्ण केलं.
अभिनेत्री सानिका भोईटेने ‘पोरी तुझे नादान’, ‘भन्नाट पोरगी’, ‘हुरपरी’, ‘रूप साजरं’, ‘तुझी माझी यारी’, ‘साज तुझा’ अशा अनेक मराठी गाण्यांमध्ये अभिनय केला आहे. तिच्या गाण्यांना मिलीयन व्ह्यूज असतात. तिचे इंस्टाग्रामवर १० लाखांहून अधिक फॉलोअर्स आहेत. सोशल मीडियावर तिचा मोठा चाहतावर्ग आहे.
नवीन संसार अन् मालिकेचं शूट कसं सांभाळतेय सुरुची अडारकर; म्हणाली, “माझा नवरा पियुष…”
अभिनेत्री सानिका भोईटे तिच्या करिअरविषयी सांगते, “मी साताऱ्यातील फलटण या गावातून पुणे इथं शिक्षणासाठी एकटीच आले. पुण्यात मी सावित्रीबाई फुले विद्यापीठातून २०२२ मध्ये बॅचलर इन बिझनेस अ‍ॅडमिनीस्ट्रेशनचं माझं पदवी शिक्षण पूर्ण केलं आणि आता मी पुण्यातच राहते. माझं शिक्षण सुरू असताना मला ग्लॅमरस बॉलीवूड जगाची भुरळ पडली. मी वयाच्या १८ व्या वर्षापासून इन्स्टाग्रामवर अनेक मोठ्या ब्युटी ब्रँडसोबत कामं केली. शिवाय मी अनेक मराठी म्युझिक अल्बममध्ये देखील काम केले. त्यात सोशल मीडिया हे असं माध्यम आहे जिथे आपण आपल्यातील टॅलेंट लोकांपर्यंत सहज पोहोचवू शकतो. हा प्रवास सोप्पा नव्हता. भविष्यात संधी मिळाल्यास मला वेब सिरीजमध्ये काम करायला नक्की आवडेल.”
