पाकिस्तानी गायक अदनान सामी आता भारताचा नागरिक आहे. लंडनमध्ये जन्मलेल्या अदनानचे वडील पश्तून होते तर आई जम्मू-काश्मीरची होती. १९८६ पासून त्याने करिअरची सुरुवात केली. त्याच्या करिअरप्रमाणेच वैयक्तिक आयुष्यातही खूप चढ-उतारांनी भरलेलं राहिलं. अदनानने तीन लग्नं केली. त्याच्या दोन्ही लग्नात अनेक समस्या आल्या. आता तो तिसऱ्या लग्नात पत्नी व मुलीबरोबर आनंदाने जगतात. आता त्याची पहिली पत्नी जेबा बख्तियारने अदनानबरोबर मोडलेल्या नात्याबद्दल भाष्य केलंय.
अदनान सामी आणि जेबा बख्तियार यांचं लग्न १९९३ मध्ये झालं आणि चार वर्षांनी १९९७ मध्ये त्यांचा घटस्फोट झाला होता. या जोडप्याला एक मुलगा होता. दोघांच्या घटस्फोटामागचे कारण कधीच समोर आले नाही परंतु हे नाते अत्यंत कटुतेने संपुष्टात आले होते. यानंतर अदनान आणि जेबा यांच्यात मुलाच्या कस्टडीसाठी खटला चालला, नंतर मुलाची कस्टडी जेबाला मिळाली. आता आमना हैदर इसानीशी बोलताना जेबाने अदनान आणि तिच्या नातेसंबंधाबद्दल तसेच लग्नाचा तिच्या अभिनय कारकिर्दीवर कसा परिणाम झाला याबद्दल सांगितलं आहे.
जेबा म्हणाली, “अदनानशी लग्न झालं तेव्हा मी काही चित्रपटांचे शूटिंग पूर्ण करत होते. त्यावेळी मला माझी अभिनय कारकीर्द सुरू ठेवण्यात फारसा रस नव्हता. मला लिहिण्याची आणि चित्रपट निर्मिती करायची होती. मी अभिनयात तेवढी सक्रिय नव्हते. त्यानंतर मी अदनानशी लग्न केले आणि अजानचा जन्म झाला. मी माझा पूर्ण वेळ या नात्यासाठी देत होतो, पण नंतर हे नाते पुढे जाऊ शकले नाही, तेव्हा मी प्रॉडक्शनवर लक्ष केंद्रित केले आणि इतर प्रोजेक्ट्स करायला सुरुवात केली.”
Video: आधी कांदे-बटाटे विकले आता मक्याची कणिसं विकतोय सुप्रसिद्ध अभिनेता, व्हिडीओ शेअर करत म्हणाला…
जेबा पुढे म्हणाली, “लग्नानंतर माझं डोकं ठिकाणावर राहिलं नव्हतं. मी काम करत होते कारण मला स्पर्धेत राहायचे होते. मला मोठ्या समस्यांचा सामना करावा लागला आहे ज्या मला आठवत नाहीत पण मला आनंद आहे की मला अजान (तिचा मुलगा) मिळाला. त्याच्या कस्टडीसाठी मी १८ महिने लढले. त्या काळात मी काम करत नव्हते. मग माझ्या मित्रांनी मला स्वतःसाठी काम करायला सांगितले. एक मित्र होता जो इंग्लंडमध्ये एक मालिका करत होता आणि मी त्याच शोमध्ये सहभागी झाले. त्याचे शूटिंग करण्यासाठी मी काही महिन्यांसाठी लंडनला गेले होते.”
