प्रसिद्ध दिग्दर्शक मणिरत्नम यांच्या ‘पोन्नियन सेल्वन’ चित्रपट गेल्या बऱ्याच दिवसांपासून चर्चेत आहे. या चित्रपटात बॉलिवूड अभिनेत्री ऐश्वर्या राय बच्चनची मुख्य भूमिका आहे. काही दिवसांपूर्वीच चित्रपटाचा टीझर प्रदर्शित झाला. ‘पोन्नियन सेल्वन’चा टीझर प्रदर्शित झाल्यानंतर त्याला प्रेक्षकांचा खूप चांगला प्रतिसाद मिळाला. या टीझरमध्ये जबरदस्त अॅक्शन आणि अप्रतिम व्हीएफएक्सचं मिश्रण पाहायला मिळालं. आता हा चित्रपट प्रदर्शनाच्या मार्गावर आहे.
आणखी वाचा – ‘ब्रह्मास्त्र’ला मिळत असलेल्या यशाबाबत कंगना रणौतचं टिकास्त्र, म्हणाली “बॉक्सऑफिस कलेक्शनचे आकडे खोटे अन्…”
५०० कोटी रुपये बजेट असलेल्या या चित्रपटामधील ऐश्वर्याचा लूक पाहून प्रेक्षक भारावून गेले. इतकंच नव्हे तर चित्रपटाचा टीझर पाहून सिनेरसिकांना ‘बाहुबली’ चित्रपटाची आठवण झाली. हा चित्रपट दोन भागांमध्ये प्रदर्शित होईल. ‘पोन्नियन सेल्वन’चा पहिला भाग ३० सप्टेंबरला प्रदर्शित होत आहे. पण त्याचपूर्वी या चित्रपटाने एक नवा विक्रम रचला आहे.
आजतकच्या वृत्तानुसार, ‘पोन्नियन सेल्वन’चे ओटीटी राइट्स जवळपास १२५ कोटी रुपयांना विकण्यात आले आहेत. अॅमेझॉन प्राइम व्हिडीओने या चित्रपटाचे ओटीटी राइट्स खरेदी केले आहेत. म्हणजेच या चित्रपटाने प्रदर्शनापूर्वी १२५ कोटी रुपयांची कमाई केली असल्याचं बोललं जात आहे. या चित्रपटाचे दोन्ही भाग अॅमेझॉन प्राइम व्हिडीओने खरेदी केली असल्याचीही चर्चा आहे.
आणखी वाचा – Video : ‘देवमाणूस ३’ लवकरच प्रेक्षकांच्या भेटीला येणार? किरण गायकवाडच्या नव्या व्हिडीओमुळे चर्चांना उधाण
या चित्रपटाची कथा ही १० व्या शतकात दक्षिण भारतावर राज्य करणाऱ्या चोळ साम्राज्याची शक्ती आणि संघर्ष यावर आधारित आहे. ‘पोन्नियन सेल्वन’च्या टीझरनंतर व्हीएफएक्स इफेक्टबरोबर स्टारकास्टबाबतही प्रेक्षकांमध्ये प्रचंड उत्सुकता पाहायला मिळत आहे. आतापर्यंत जवळपास सर्वच कलाकारांचे लूक समोर आले आहेत. ऐश्वर्या राय बच्चनसह विक्रम, कार्ति, जयम रवि, प्रकाश राज, नस्सर, शोभिता धूलिपाला, प्रभु आणि किशोर या सर्वच कलाकारांचे लूक सोशल मीडियावर चर्चेत आहेत.
