लोकप्रिय भोजपुरी अभिनेत्री आकांक्षा दुबेने रविवारी(२६ मार्च) गळफास घेत आत्महत्या केली. हॉटेलमधील रुममध्ये पंख्याला लटकलेल्या अवस्थेत तिचा मृतदेह आढळला. आकांक्षाच्या आत्महत्येचं कारण अद्याप समोर आलेलं नाही. परंतु, आत्महत्येनंतर अभिनेत्रीच्या गायक व अभिनेता समर सिंहबरोबर असलेल्या नात्याबाबत चर्चा रंगली आहे.
आत्महत्या करण्याच्या महिन्याभरापूर्वीच आकांक्षाने प्रेमाची कबुली दिली होती. १४ फेब्रुवारीला व्हॅलेंटाइन डेच्या दिवशी आकांक्षाने समर सिंहबरोबरचा रोमँटिक फोटो तिच्या इन्स्टाग्राम अकाऊंटवरुन शेअर केला होता. या फोटोला तिने “व्हॅलेंटाइन डेच्या शुभेच्छा” असं कॅप्शन देत हार्ट इमोजी पोस्ट केले होते. या पोस्टद्वारे आकांक्षाने तिच्या व समर सिंहच्या नात्याचा खुलासा केला होता. आकांक्षा व समर लिव्ह इन रिलेशनशिपमध्ये राहत असल्याचीही चर्चा रंगली होती.
आकांक्षाच्या मृत्यूनंतर तिचा बॉयफ्रेंड समर सिंहवर कुटुंबियांनी आरोप केले आहेत. समर सिंह व त्याचा भाऊ संजय सिंहला अभिनेत्रीच्या मृत्यूसाठी कुटुंबियांनी जबाबदार धरलं आहे. आकांक्षांचं कोटी रुपयांचं मानधन दिलं नसल्याबरोबरच तिला जीवे मारण्याछी धमकी दिल्याचा आरोप अभिनेत्रीच्या आईने केला आहे. तर आकांक्षा व समर लिव्ह इनमध्ये राहत नव्हते. समर सिंहच तिच्या पाठीमागे लागला होता, असं अभिनेत्रीच्या कुटुंबियांचे म्हणणे आहे.
आकांक्षाच्या हॉटेलमधील रुममध्ये कोणत्याही प्रकारची सुसाइड नोट सापडली नसल्याचं पोलिसांनी सांगितलं आहे. आकांक्षाचा मृतदेह शवविच्छेदनासाठी पाठविण्यात आला असून याप्रकरणी पोलीस अधिक तपास करत आहे.
