बॉलीवूड अभिनेता अक्षय कुमार हा लोकप्रिय अभिनेत्यांपैकी एक आहे. नुकताच अक्षयचा ‘बच्चन पांडे’ हा चित्रपट प्रदर्शित झाला. पण ‘द काश्मीर फाइल्स’ या चित्रपटामुळे त्याचा हा चित्रपट फ्लॉप गेला असा टोमणा त्याने मारला आहे. अक्षयने भोपाळ येथे आयोजित ‘चित्र भारती फिल्म फेस्टिव्हल’मध्ये हजेरी लावली होती. यावेळी अक्षयसोबत ‘द काश्मीर फाइल्स’ चित्रपटाचे दिग्दर्शक विवेक अग्निहोत्रीही मंचावर उपस्थित होते.
हा फिल्स फेस्टिव्हल माखनलाल चतुर्वेदी नॅशनल युनिव्हर्सिटी ऑफ जर्नलिझम अँड कम्युनिकेशनने आयोजित केला होता. या कार्यक्रमात बोलताना अक्षय म्हणाला, “आम्हाला सगळ्यांना आपल्या देशाच्या काही माहित असलेल्या गोष्टी किंवा न माहित असलेल्या गोष्टी सांगायच्या आहेत. विवेकजींनी द काश्मीर फाइल्स बनवून आपल्या देशाचे एक अत्यंत वेदनादायक सत्य सगळ्यांसमोर मांडले आहे. हा चित्रपट पाहिल्यानंतर आपण सगळे हादरून गेलो आहोत. एवढंच काय माझा चित्रपट पण बुडवला.” अक्षयचा हा व्हिडीओ सोशल मीडियावर प्रचंड व्हायरल झाला आहे.
आणखी वाचा : या चित्रात तुम्हाला सगळ्यात आधी काय दिसले? यावरून कळेल तुमचे व्यक्तीमत्त्व
‘द काश्मीर फाइल्स’ या चित्रपटाने २०० कोटींच्या वर बॉक्स ऑफिसवर गल्ला केला आहे. हा चित्रपट काश्मिरी पंडितांच्या स्थलांतरित जीवनावर आधारित आहे. काश्मीर फाईल्स हा चित्रपट १९८९ आणि १९९० मध्ये काश्मिरी पंडितांच्या झालेल्या स्थलांतरावर आधारित आहे. हा चित्रपट अनेक राज्यांमध्ये करमुक्त करण्यात आला आहे.
