…आणि अक्षय कुमारने घेतले चक्क कपिल शर्माकडून आशिर्वाद

खिलाडी कुमारने नुकतीच कपिल शर्माच्या ‘द कपिल शर्मा शो’ च्या नव्या सिझनच्या ग्रॅण्ड प्रिमिअरला हजेरी लावली होती. या आधी देखील अक्षय कुमारने आपल्या अनेक सिनेमांच्या प्रमोशनसाठी कपिल शर्माच्या शोमध्ये हजेरी लावली आहे. यावेळी देखील अक्षयने कपिल शर्माच्या या नव्या सिझनच्या पहिल्याच एपिसोडमध्ये खास हजेरी लावत सिनेमाचं प्रमोशन देखील केलंय. लवकरच हा एपिसोड प्रेक्षकांच्या भेटीला येईल.

कपिल शर्माने त्याच्या इन्स्टाग्राम अकाऊंटवर एक फोटो शेअर केलाय. या मजेशीर फोटोत अक्षय कुमार वाकून कपिल शर्माचे पाय धरत असल्याचं दिसतंय. खरं तर हा फोटो कपिल शर्माच्या एका जुन्या एपिसोडचा आहे. हा फोटो शेअर करत कपिल कॅप्शनमध्ये म्हणाला, “सुप्रसिद्ध बॉलिवूड अभिनेता अक्षय कुमार आपला आगामी सिनेमा बेलबॉटमसाठी आशिर्वाद घेताना”

कपिलने शेअर केलेल्या या फोटोला सोशल मीडियावर मोठी पसंती दिली जातेय. या फोटोवर अनेक नेटकऱ्यांनी धमाल कमेंटदेखील केल्या आहेत. एक नेटकरी म्हणाला, “आता अक्षय सर पहाटे साडे चार वाजता शूटिंग ठेवणार”. काही दिवसांपूर्वीच कपिल शर्माच्या नव्या शोचा टीजर प्रदर्शित झालाय. यात शोमधील संपूर्ण टीम दिसतेय.