Exclusive : “…म्हणून हिंदी चित्रपटसृष्टी संपली असं नाहीये” बॉलिवूडच्या सद्यस्थितीवर आलिया भट्ट स्पष्टच बोलली

या मुलाखतीत आलियाला, ‘सध्या बॉलिवूड चित्रपटांसाठी कठीण काळ आहे अशा निर्माती होण्याचा निर्णय घेणं आव्हानात्मक वाटलं नाही का?’ असा प्रश्न विचारण्यात आला. त्यावर बोलताना आलिया म्हणाली, “नाही, कारण मला वाटतं हे संपूर्ण वर्ष भारतीय चित्रपटांसाठी कठीण काळ आहे. आपण फक्त सातत्यानं हिंदी चित्रपटांबद्दल बोलतोय. पण आतापर्यंत प्रदर्शित झालेल्या चित्रपटांचा आकडा पाहता आपल्या हे लक्षात येईल की संपूर्ण देशभरात फार कमी चित्रपट बॉक्स ऑफिसवर यशस्वी ठरले. अगदी दाक्षिणात्य चित्रपटांबद्दल बोलायचं तर त्यातले सर्वच चित्रपट हिट झालेले नाहीत. काही निवडक चित्रपट खूपच हिट ठरले. हिंदी चित्रपटांचंही तसंच आहे. हिंदीतील काही चित्रपटांनीही चांगला गल्ला जमवला आहे. ज्या चित्रपटाचा कंटेन्ट चांगला आहे. तो चित्रपट बॉक्स ऑफिसवर यशस्वी ठरला आहे आणि हे नेहमीच होतं.”

आणखी वाचा- Video : “हेच भारतीय संस्कार…” आलियाच्या ‘त्या’ कृतीचं सोशल मीडियावर होतंय कौतुक

आलिया पुढे म्हणाली, “आजकाल चित्रपटांची फार बारकाईने समीक्षा होते. कारण करोनाच्या काळात बराच काळ चित्रपटगृह बंद होती आणि चित्रपटसृष्टी काही काळासाठी पूर्णपणे बंद पडली होती. त्यानंतर आता कोणते चित्रपट प्रेक्षकांना आवडतील, कोणते चित्रपट चित्रपटगृहात प्रदर्शित करायचे आणि कोणते ओटीटीवर हे ठरवलं जातं. ज्या चित्रपटांचे विषय चांगले आहेत ते अर्थातच चांगले चालतात. इतर अपयशी ठरत आहेत पण याचा अर्थ हिंदी चित्रपटसृष्टी संपुष्टात आली असा होत नाही.”

दरम्यान आलिया भट्टच्या कामाबद्दल बोलायचं तर ती तिचा ‘डार्लिंग’ चित्रपट येत्या ५ ऑगस्टला नेटफ्लिक्स या ओटीटी प्लॅटफॉर्मवर प्रदर्शित होतोय. या चित्रपटात आलियासोबत विजय वर्मा, रोशन मॅथ्यू आणि शेफाली शाह यांच्याही महत्त्वपूर्ण भूमिका आहेत. याशिवाय रणबीर कपूरसोबत तिचा ‘ब्रह्मास्त्र’ चित्रपट ९ सप्टेंबरला प्रेक्षकांच्या भेटीला येत आहे. तसेच आगामी काळात ती रणवीर सिंगसोबत ‘रॉकी और रानी की प्रेम कहानी’ तसेच हॉलिवूड चित्रपट ‘हार्ट ऑफ स्टोन’मध्ये दिसणार आहे.