दाक्षिणात्य सुपरस्टार अल्लू अर्जुनचा धमाकेदार अॅक्शन चित्रपट ‘पुष्पा’ प्रदर्शनानंतर बराच चर्चेत आहे. बॉक्स ऑफिसवरही या चित्रपटानं मोठा गल्ला जमवला. त्यानंतर ७ जानेवरीला प्राइम व्हिडीओवर हा चित्रपट तमिळ, तेलुगू, कन्नड आणि मल्याळम या भाषांमध्ये प्रदर्शित करण्यात आला. मात्र हिंदी भाषेत हा चित्रपट अद्याप ओटीटीवर प्रदर्शित करण्यात आलेला नाही. त्यामुळे हिंदी भाषेत हा चित्रपट कधी रिलीज होणार यांची प्रेक्षकांमध्ये उत्सुकता आहे. पण आता लवकरच हा चित्रपट हिंदी भाषेतही ओटीटीवर प्रदर्शित होणार आहे.
हिंदी भाषेतील ‘पुष्पा’ चित्रपटानं बॉक्स ऑफिसवर तब्बल ८० कोटींचा गल्ला जमवला आहे. त्यामुळे जेव्हा ७ जानेवारीला हा चित्रपट तमिळ, तेलुगू, कन्नड आणि मल्याळम या भाषांमध्ये ओटीटीवर प्रदर्शित झाला तेव्हापासून प्रेक्षक याच्या हिंदी व्हर्जनची आतुरतेनं वाट पाहताना दिसत होते. पण आता प्रेक्षकांची ही प्रतीक्षा संपली आहे. येत्या १४ जानेवरीला प्राइम व्हिडीओवर हा चित्रपट हिंदी भाषेत प्रदर्शित होणार आहे.
देशात करोना विषाणूचा वाढता प्रादुर्भाव पाहता प्रेक्षक आता काही राज्यांमध्ये चित्रपटगृह बंद करण्यात आली आहे. तसेच अनेक प्रेक्षकही सुरक्षेच्या कारणास्तव चित्रपटगृहांमध्ये जाणं टाळताना दिसत आहे. अशा परिस्थितीत ‘पुष्पा’ ओटीटीवर प्रदर्शित होणं ही प्रेक्षकांसाठी आनंदाची बातमी आहे. चित्रपटाच्या कमाईचा चढता आलेख पाहता प्रेक्षकांमध्ये चित्रपटाची किती लोकप्रियता आहे हे लक्षात येतं.
‘पुष्पा’ चित्रपटात अल्लू अर्जुन सोबतच अभिनेत्री रश्मिका मंदानाचीही मुख्य भूमिका आहे. याशिवाय या चित्रपटात फहद फासिल, अनसूया भारद्वाज आणि अजय घोष यांच्याही महत्त्वपूर्ण भूमिका आहेत. चित्रपटाचं दिग्दर्शन आणि लेखन सुकुमार यांनी केलं आहे. तसेच या चित्रपटात अभिनेत्री सामंथा रुथ प्रभु हिचं आयटम नंबरही आहे. ज्याची सध्या सोशल मीडियावर बरीच चर्चा होताना दिसत आहे.
