बलात्काराचा आरोप असलेले आलोक नाथ #MeTooवरील चित्रपटात न्यायाधीशाच्या भूमिकेत

बॉलिवूडमधील #MeToo मोहिमेवर ‘मैं भी’ हा चित्रपट येत असून नासिर खान त्याचे दिग्दर्शन करत आहेत. या चित्रपटाविषयी विचारले असता आलोक नाथ म्हणाले, ‘सध्याच्या घडीला मी कोणताच चित्रपट करत नाहीये. पण काही महिन्यांपूर्वी मी एका चित्रपटासाठी शूटिंग केलं होतं. तुम्हाला त्याचा काही त्रास आहे का? मी चित्रपटात झळकणार म्हटल्यावर तुम्हाला का इतकं दु:ख होत आहे. निर्मात्यासाठी मी ही छोटीशी भूमिका साकारली आहे आणि त्याला प्रदर्शित होऊ द्या.’ या चित्रपटात खालिद सिद्दीकी, शावर अली, इम्रान खान, मुकेश खन्ना आणि शाहबाज खान यांच्या प्रमुख भूमिका आहेत. चित्रपटाच्या अखेरीस आलोक नाथ न्यायाधीश म्हणून विनयभंगावर भाष्य करताना दिसतील, असं कळतंय.

विनता नंदा यांच्यानंतर अभिनेत्री संध्या मृदुल, हिमानी शिवपुरी आणि दीपिका अमीन यांनी आलोक नाथांवर लैंगिक गैरवर्तणुकीचे आरोप केले होते. या आरोपांनंतर ‘द सिने अँड टीव्ही आर्टिस्ट असोसिएशन’ने त्यांना असोसिएशनमधून काढून टाकण्याचा निर्णय घेतला होता.