Anant Ambani-Radhika Merchant Sangeet: एन्कोर हेल्थकेअर प्रायव्हेट लिमिटेडचे सीईओ वीरेन मर्चंट व उद्योजिक शैला मर्चंट यांची लेक राधिका मर्चंट लवकरच अंबानींची सून होणार आहे. मुकेश अंबानी यांचा धाकटा मुलगा अनंत अंबानीशी राधिका १२ जुलैला लग्नबंधनात अडकणार आहे. मोठ्या थाटामाटात अनंत-राधिका लग्नसोहळा मुंबईत पार पडणार आहे. सध्या लग्नाआधीचे कार्यक्रम जोरदार सुरू आहेत. ५ जुलैला संगीत सोहळ्याचे आयोजन करण्यात आलं होतं. या संगीत सोहळ्यात जगप्रसिद्ध पॉपस्टार जस्टिन बीबरसह बॉलीवूड कलाकारांनी जबरदस्त डान्स केला. एवढंच नव्हे अंबानी कुटुंबातील सदस्य देखील थिरकले. सध्या अनंत-राधिकाच्या संगीत सोहळ्यातील व्हिडीओ सोशल मीडियावर तुफान व्हायरल झाले आहेत. अशातच राधिका मर्चंटचा डान्स व्हिडीओ समोर आला आहे.
अनंत अंबानी-राधिका मर्चंटच्या लग्नाला अवघे काही दिवस बाकी आहेत. पण लग्नाआधी आणि लग्नानंतर अनेक कार्यक्रमाचं आयोजन अंबानींनी केलं आहे. त्यानुसार लग्नाआधी सामूहिक विवाह सोहळा, मामेरू समारंभ, गरबा नाईट आणि संगीत सोहळा पार पडला आहे. ५ जुलैला झालेल्या संगीत सोहळ्यात अंबानींच्या होणाऱ्या लाडक्या सूनेने सुंदर डान्स केला.
संगीत सोहळ्यातील राधिकाचा डान्स व्हिडीओ ‘फिल्मी ग्यान’ या इन्स्टाग्राम पेजवर शेअर करण्यात आला आहे. या व्हिडीओत राधिका राणी मुखर्जीच्या ‘साथिया’ चित्रपटातील ‘छलका छलका रे’ गाण्यावर सुंदर डान्स करताना पाहायला मिळत आहे. राधिकाचा हा डान्स व्हिडीओ सोशल मीडियावर चांगलाच व्हायरल झाला आहे.
दरम्यान, अनंत अंबानी आणि राधिका मर्चंट १२ जुलैला शुभ मुहूर्तावर म्हणजेच दुपारी ३ वाजता लग्नबंधनात अडकणार आहेत. माहितीनुसार, अंबानींच्या अँटिलिया निवासस्थानी दोघं लग्नाचे सात फेरे घेणार आहेत. त्यानंतर १३ जुलैला संध्याकाळी आशीर्वाद समारंभ होणार आहे. या समारंभाला मोजके पाहुणे उपस्थित राहणार आहेत. १४ जुलैला रिसेप्शन सोहळा आयोजित करण्यात आला आहे. या सोहळ्याला मीडिया आणि फिल्म इंडस्ट्रीतील लोकांना आमंत्रित करण्यात आलं आहे.
© IE Online Media Services (P) Ltd