भारतीय क्रिकेट संघाचा खेळाडू ऋषभ पंतच्या कारला ३० डिसेंबरला (शुक्रवारी) भीषण अपघात झाला. ऋषभच्या अपघातानंतर त्याची स्थिती पाहून सगळ्यांनाच दुःखद धक्का बसला. अपघातानंतर तो कारमधून बाहेर पडताच त्याचा कारला आग लागली. लगेचच ऋषभला रुग्णालयात उपचारासाठी दाखल करण्यात आलं. दरम्यान देहरादूनच्या मॅक्स रुग्णालयामध्ये जाऊन अनिल कपूर व अनुपम खेर यांनी त्याची भेट घेतली.
ऋषभच्या अपघातानंतर क्रिकेटप्रेमी त्याच्या उत्तम आरोग्यासाठी प्रार्थना करत आहेत. तर सोशल मीडियाद्वारे त्याचे चाहते तू लवकर बरा हो असं सतत म्हणत आहेत. दरम्यान अनिल व अनुपम यांनी ऋषभची भेट घेतल्यानंतर तो ठिक असल्याचं त्यांनी ‘एएनआय’ला सांगितलं. शिवाय दोघांनी ऋषभच्या कुटुंबियांचीही भेट घेतली.
यावेळी अनुपम खेर यांनी सगळ्यांनाच एक मोलाचा सल्ला दिला. अनुपम म्हणाले, “कृपया गाडी सावकाश चालवा. कारण देहरादून भागामध्ये रात्री धुकं अधिक असतं. त्यामुळे काळजीपूर्वक गाडी चालवा.” अनुपम यांनी यावेळी सगळ्यांना नविन वर्षाच्या शुभेच्छाही दिल्या.
आणखी वाचा – ऋषभ पंतला भेटायला गेले अनिल कपूर व अनुपम खेर; नेटकऱ्यांना फोटोमध्ये दिसलं भलतंच.. पाहा मीम्स
अनिल व अनुपम यांच्याबरोबरच पंतप्रधान नरेंद्र मोदींनीही ऋषभ पंतच्या घरी फोन करत त्याच्या तब्येतीची विचारपूस केली. तसेच भारतीय क्रिकेट संघाचे खेळाडूही त्याच्या उत्तम आरोग्यासाठी प्रार्थना करत आहेत.
