आमच्या नात्याविषयी वायफळ चर्चा करणे थांबवा; अरबाझ खानची संतप्त प्रतिक्रिया

गेल्या काही दिवसांपासून प्रसारमाध्यमांमध्ये मलायका आणि अरबाझ खान यांच्या घटस्फोटाविषयी सुरू असलेल्या चर्चेमुळे अरबाझ खान चांगलाच भडकला आहे. त्याने ट्विटरवरून आपला राग व्यक्त केला असून मलायकाच्या आणि माझ्या वैयक्तिक आयुष्याबद्दल स्पष्टीकरण देण्यासाठी मी बांधील नसल्याचे सांगितले आहे. आमची इन्स्टाग्रामवरील छायाचित्रे आणि वैवाहिक नात्याविषयी वायफळ तर्कवितर्क आणि चर्चा करणे थांबवा. आमच्या नात्याबद्दल चर्चा करायला तो काही चित्रपट नाही, असेही अरबाझने म्हटले आहे. या दोघांमध्ये सध्या बरेच ताणतणाव असून ते विभक्त होणार असल्याचे वृत्त काही दिवसांपूर्वी स्पॉटबॉय डॉट कॉमने दिले होते.