अंबानी कुटुंबीय आपल्या नव्या सुनेचं स्वागत करण्यासाठी आता सज्ज झाले आहेत. अनंत व राधिका मर्चंट यांचा विवाहसोहळा येत्या १२ जुलैला पार पडणार आहे. वांद्रे कुर्ला कॉम्प्लेक्समधील जिओ वर्ल्ड कन्व्हेन्शन सेंटरमध्ये या भव्य लग्नसोहळ्याचं तीन दिवस आयोजन करण्यात आलं आहे. अनंत-राधिकाची लग्नपत्रिका सध्या सोशल मीडियावर व्हायरल होत आहे. या लग्नात काय-काय खास असणार याची उत्सुकता प्रत्येकाच्या मनात निर्माण झाली आहे. अशातच आता अंबानी कुटुंबीयांनी लग्नात ठरवलेला वेडिंग मेन्यू नेमका काय असेल याबद्दल माहिती समोर आली आहे.
अनंत अंबानी व राधिका मर्चंट यांच्या लग्नात वाराणसीमधला प्रसिद्ध काशी चाट भांडार स्टॉल लावण्यात येणार आहे. रिलायन्स फाऊंडेशनच्या संस्थापक आणि अध्यक्षा नीता अंबानी यांनी लेकाच्या लग्नापूर्वी जून महिन्यात काशी विश्वनाथाच्या मंदिरात जाऊन दर्शन घेतलं होतं. यानंतर त्यांनी जवळपासच्या दुकानांना भेट दिली होती. यावेळी नीता अंबानी यांनी वाराणसीच्या विविध पदार्थांचा आस्वाद घेतला होता.
एनआयने दिलेल्या माहितीनुसार, नीता अंबानी यांनी राकेश केशरी यांच्या दुकानातील चाटचे (Chaat) विविध प्रकार खाऊन पाहिले. या पदार्थांची चव घेतल्यावर त्यांनी दुकानाचे मालक केशरी यांना लेकाच्या लग्नासाठी आमंत्रित केलं आहे. केशरी यांच्या टीमला लग्नात टिक्की, टोमॅटो चाट, पालक चाट, चना कचोरी आणि कुल्फी असे पदार्थ बनवण्यास सांगितलं जाणार आहे.
“नीता अंबानी २४ जून रोजी आमच्या चाट भंडारमध्ये आल्या, त्यांनी टिक्की चाट, टोमॅटो चाट, पालक चाट आणि कुल्फी फालूदा खाल्ला. त्या खूप खूश झाल्या आणि म्हणाल्या, ‘बनारसच्या चाटचे विविध प्रकार जगभरात प्रसिद्ध आहेत” अशी माहिती केशरी यांनी एएनआय दिली आहे.
अनंत अंबानी आणि राधिका मर्चंट यांचं लग्न पारंपारिक हिंदू पद्धतीनुसार होणार आहे. हे जोडपं १२ जुलै रोजी लग्नगाठ बांधेल. लग्नाच्या दिवशी, पाहुण्यांसाठी खास पारंपरिक थीम ठेवण्यात आली आहे. राधिका मर्चंट ही एन्कोर हेल्थकेअरचे सीईओ वीरेन मर्चंट आणि उद्योजक शैला मर्चंट यांची मुलगी आहे.
दरम्यान, यापूर्वी अनंत अंबानी आणि राधिका मर्चंट यांचा पहिला प्री-वेडिंग सोहळा गुजरातमधील जामनगर येथे आयोजित करण्यात आला होता. तर, या जोडप्याचा दुसरा प्री-वेडिंग सोहळा मे महिन्याच्या अखेरीस इटलीत पार पडला होता. जामनगरला रिहाना, दिलजीत दोसांझ, अरिजित सिंहसारख्या सेलिब्रिटींनी परफॉर्मन्स केले होते. दोन्ही सोहळ्यांना बॉलीवूडकलाकारांची मांदियाळी पाहायला मिळाली होती.
