“जा सुमन जी ले अपनी जिंदगी”; भाग्यश्रीला सांगतात तिची मुलं

“मी सिनेसृष्टीतून दूर जाण्याचा निर्णय घेतल्याबद्दल मला अजिबात दु:ख वाटत नाही. मी माझ्या करिअरपेक्षा कुटुंबाला प्राधान्य दिले. मी स्वत:ला फार भाग्यवान समजते. मला माझ्या नवऱ्याला लपवायचे नव्हते. तसेच करिअरमुळे मला लग्न करता येत नाही, ही खंतही मला कधीच बोलून दाखवायची नव्हती. त्यामुळे मी वेळेत लग्न केले. मला दोन मुलं आहेत. सध्या ती त्यांच्या करिअरवर लक्ष केंद्रीत करत आहेत,” असे भाग्यश्रीने सांगितले.

“कधीकधी तर माझी दोन्ही मुले मला सांगतात, ‘जा सुमन जा, जी ले अपनी जिंदगी’. चित्रपटातील हे वाक्य मला तंतोतंत लागू होतं. त्यांच्या समर्थन आणि प्रोत्साहनामुळेच मी पुन्हा सिनेसृष्टीत काम करण्याचा निर्णय घेतला.” असेही भाग्यश्रीने स्पष्ट केले.

भाग्यश्रीच्या मते, “१९-२० या वयात प्रसिद्धी सोडणे हा एक फार मोठा निर्णय होता. जर तुम्हाला कुटुंब, समाज आणि करिअर सांभाळताना समस्या येत असतील तर तुम्ही त्याकडे दुर्लक्ष केले पाहिजे. ‘मैने प्यार किया’ या चित्रपटाला प्रेक्षकांचं भरभरुन प्रेम मिळालं. पण, एक स्त्री म्हणून माझ्यावर काही जबाबदाऱ्या होत्या. त्यात अभिमन्यूचाही जन्म झाला होता. त्यामुळे मी जवळपास सर्वच ऑफर्स नाकारल्या. पण, त्याबद्दल मला कधीही खंत वाटली नाही.”

“सलमानसोबत काम करायला नक्की आवडेल“

यावेळी भाग्यश्रीला सलमानसोबत पुन्हा काम करण्याबद्दल विचारण्यात आला असता, ती म्हणाली, “मी गेल्या कित्येक वर्षांपासून सलमानला भेटली नाही. सलमान हा फार उत्कृष्ट अभिनेता आहे. तो फार तरुण कलाकारांसोबत काम करतो. मात्र जर भविष्यात सलमानसोबत काम करण्याची संधी मिळाली तर मी ती नक्की स्विकारेन,” असेही तिने सांगितले.