अल्पवयीन मुलीवर बलात्कार केल्याप्रकरणी भोजपुरी गायक अभिषेक उर्फ बाबुल बिहारी याला अटक करण्यात आली आहे. त्याच्यावर आक्षेपार्ह फोटो ऑनलाइन शेअर केल्याचा आरोप आहे. याप्रकरणी पोलीस अधिक तपास करत आहेत. अल्पवयीन पीडित मुलगी व तिच्या कुटुंबीयांची पोलिसांनी चौकशी केली.
मीडिया रिपोर्टनुसार, ही घटना दोन वर्षांपूर्वी घडलेली आहे. १३ वर्षीय अल्पवयीन मुलीला बाबुल बिहारीने मोहात पाडून राजीव नगर येथील एका हॉटेलमध्ये नेलं होतं. त्यानंतर त्या मुलीचे काही आक्षेपार्ह फोटोही त्याने काढले होते. त्यानंतर पीडित मुलीने बाबुल बिहारीशी संपर्क तोडला होता. तिच्या कुटुंबीयांना याबाबत काहीच माहिती नव्हती.
बाबुल बिहारीने दोन वर्षांनंतर मुलीचे आक्षेपार्ह फोटो शेअर केले. त्यानंतर पीडित मुलीच्या कुटुंबीयांना याबाबत तिला विचारले असता तिने घडलेला प्रकार सांगितला. त्यानंतर पीडित मुलीच्या कुटुंबीयांनी पोलीस ठाण्यात धाव घेत बाबुल बिहारीविरोधात तक्रार नोंदविली. या तक्रारीनंतर पोलिसांनी कारवाई करत बाबुल बिहारीला बुधवारी(७ जून) अटक केली. त्याच्यावर पोक्सो अंतर्गत एफआयआर दाखल करण्यात आली आहे.
कोण आहे बाबुल बिहारी?
बाबुल बिहारी हा भोजपुरी गायक आहे. त्याचं खरं नाव अभिषेक असं आहे. बिहारमध्ये वास्तव्यास असलेल्या बाबुल बिहारीचं युट्यूब चॅनेलही आहे. इन्स्टाग्रामच्या बायोमध्ये त्याने गायक व अभिनेता असल्याचं म्हटलं आहे.
