Kiss कॉन्ट्रोव्हर्सीनंतर अभिजित बिचुकलेचा आत्महत्येचा प्रयत्न?

अभिजित बिचुकलेनं मागच्या आठवड्यात अभिनेत्री देवोलीनाकडे किसची मागणी केल्यानंतर घरातील सर्वच सदस्यांनी त्याच्या या वागण्यावर आक्षेप घेत त्याच्याशी बोलणं बंद केलं. त्यामुळे आता अभिजित बिचुकलेला घरात एकटं राहावं लागत आहे. अशात अभिजित बिचुकलेनं घरातील काही सदस्यांना विष पिण्याची इच्छा होत असल्याचं सांगितलं. ज्यामुळे सर्वांना धक्का बसला आहे.

अभिजित बिचुकले निशांतकडे जाऊन त्याला विचारतो की, ‘वॉशरुममध्ये कोणता हेअर कलर आहे का? मला खायचा आहे. मागच्या काही दिवसांपासून घरात जे चाललं आहे त्यामुळे मी वैतागलो आहे.’ ही गोष्ट निशांत, शमिता आणि रश्मी यांना सांगतो आणि त्यानंतर प्रतीक अभिजितला समजावण्याचा प्रयत्न करतो.  

मागच्या आठवड्यात ‘तिकिट टू फिनाले’च्या कार्यात अभिजित बिचुकलेनं देवोलीनाला मदत करण्याच्या बदल्यात तिच्याकडे किसची मागणी केली होती. देवोलीनानं याबाबत सर्वांना सांगितल्यानंतर घरातील जवळपास सर्वच सदस्य अभिजितच्या विरोधात गेलेले पाहायला मिळाले. विशेष म्हणजे आपल्या अशा वर्तनाबाबत अभिजितनं कोणाचीही माफी मागितली नव्हती.