…म्हणून देव आनंद यांना नाव बदलून फोन करत होती ही अभिनेत्री

नंबर छापला गेल्यापासूनच देव आनंद यांच्या ऑफिसमध्ये चाहत्यांचे फोन येण्यास सुरुवात झाली. देव साहेब जेव्हा ऑफिसमध्ये असत तेव्हा फोन उचलून चाहत्यांशी संवाद साधत. हे सर्व सुरु असतानाच एक अभिनेत्री त्यांची फार मोठी चाहती होती. तिने एक चाहतीच म्हणून देव यांना फोन केला. त्यावेळी या अभिनेत्रीने दोन- तीन चित्रपटांमध्ये काम केलं होतं. त्यामुळे तिने नाव बदलून फोन करण्याचा निर्णय घेतला. रिटा या नावाने तिने घाबरत ‘नवकेतन’च्या ऑफिसमध्ये फोन केला आणि तो देव आनंद यांनीच उचलला.

फोनवरुन आपल्या आवडत्या कलाकाराशी संवाद साधताना त्या अभिनेत्रीच्या आवाजातून आनंद व्यक्त होत होता. त्यानंतर तिचं फोन करणं सुरुच होतं. एक दिवस देव आनंद यांनी फोनवर बोलतानाच रिटाला ‘जॉनी मेरा नाम’च्या सेटवर भेटण्यासाठी बोलावलं. हे ऐकून रिटा फार खूश झाली. पण, ती कधीच देव आनंद यांना भेटायला गेली नाही. किंबहुना त्यानंतर तिने त्यांच्या ऑफिसमध्ये फोन करणंही बंद केलं. आता तुम्ही म्हणाल ही रिटा म्हणजे नेमकी कोणती अभिनेत्री होती?

(व्हिडिओ सौजन्य- आरजे अनमोल / फेसबुक)

देव आनंद यांना नाव बदलून फोन करणारी ती अभिनेत्री होती रेखा. दाक्षिणात्य चित्रपटसृष्टीतून बॉलिवूडमध्ये रेखा यांनी आपलं स्थान निर्माण केलं. आता रेखा यांचं हे अनोखं ‘फॅनहूड’ देव आनंद यांच्यापर्यंत कधी पोहोचलं की नाही हे सांगता येणं कठीण आहे. पण, नशीबाची खेळी म्हणा किंवा आवडत्या कलाकारापोटी असणारं प्रेम म्हणा… रेखा यांच्या आयुष्यात अशी एक संधी आली ज्यावेळी रिटा म्हणजेच रेखा यांच्या हस्ते हिंदी चित्रपटसृष्टीतील ‘गाईड’ला म्हणजेच अभिनेता देव आनंद यांना जीवनगौरव या पुरस्काराने गौरवण्यात आलं होतं.