आपल्या संगीताने आणि गायकिने जगभरातील संगीतप्रेमींना भुरळ घालणारे संगीतकार-गायक ए आर रेहमान यांच्या विविध भाषांमधील गाण्यांनी रसिकांना मंत्रमुग्ध केलं. भारतीय संगीत आणि पाश्चात्त्य संगीत यांचा मिलाप त्यांच्या गाण्यांमधून पाहायला मिळतो. त्यांनी ऑस्कर पुरस्कारवरही स्वतःचे नाव कोरले आहे. जगभरातील आघाडीच्या संगीतकारांमध्ये त्यांचं नाव सामील आहे.
रेहमान यांना मातृभाषेबद्दल असलेला अभिमान सगळ्यांनाच ठाऊक आहे. बऱ्याच ठिकाणी रेहमान हे हिंदी भाषेचा वापर करायचा टाळतात किंबहुना ते तुम्हाला हिंदीत बोलताना दिसणारच नाही, आता पुन्हा एका कार्यक्रमात रेहमान यांनी त्यांची पत्नी सायरा बानू हिला हिंदीत बोलण्यापासून रोखलं आहे.
आणखी वाचा : राखी सावंत ‘Z Security’साठी घेणार पंतप्रधान मोदींची भेट; अभिनेत्री म्हणाली, “जर कंगनाला सुरक्षा…”
नुकतंच रेहमान यांना विकटन सिनेमा अवॉर्ड’मध्ये पुरस्कार देऊन सन्मानित करण्यात आलं. यावेळी पुरस्कार स्वीकारताना रेहमान यांनी त्यांच्या पत्नीला मंचावर बोलावलं आणि पुरस्कार स्वीकारताना दोन शब्द बोलायचीही विनंती केली. मंचावर आल्याने तिने रेहमान यांना मिठी मारली. जशी रेहमान यांची पत्नी बोलायला सरसावली तेव्हा रेहमान तिला तमिळमध्ये म्हणाले, “कृपया तमिळमध्ये बोल, हिंदीमध्ये नाही.”
रेहमान यांचं हे म्हणणं ऐकून सायरा हसून म्हणाली, “मला माफ करा, मी तमिळमध्ये सराईतपणे बोलू शकत नाही. मी खूप आनंदी आहे कारण रहमानचा आवाज माझा सर्वात आवडता आवाज आहे. मी त्याच्या या सुरेल आवाजाच्या प्रेमात पडले आहे मी एवढंच सांगू शकते.” आज एवढ्या वेगवेगळ्या भाषांमध्ये काम करूनही रेहमान यांना त्यांच्या भाषेबद्दल असलेला अभिमान यातून स्पष्टपणे दिसतो. रेहमान आणि सायरा यांनी १९९५ मध्ये लग्नगाठ बांधली.
