ए.आर रेहमान पुन्हा चर्चेत, सर्जन्‍स असोसीएशनवर संगीत दिग्दर्शकाचा मानहानीचा आरोप; केली १० कोटींची मागणी

रेहमान यांनी असोसिएशनवर वार्षिक परिषदेत आपल्या नावाची बदनामी केल्याचा आरोप केला आहे. रेहमान यांनी मानहानीसाठी १० कोटी रुपयांची भरपाईदेखील मागितली आहे. यावर ASICON ने आरोप केला आहे की २०१८ मध्ये, रहमान संस्थेच्या ७८ व्या वार्षिक संमेलनात परफॉर्म करणार होते, परंतु ते उपस्थित राहू शकले नाहीत. यासाठी रेहमान यांनी एडवांस म्हणून घेतलेले २९.५ लाख रुपयेही परत केलेले नाहीत.

आणखी वाचा : ‘OMG 2’चे दिग्दर्शक यांनी ‘CBFC’ला म्हंटलं ढोंगी; म्हणाले, “रॉकी और रानीमधील किसिंग…”

एआर रेहमान यांची वकील नर्मदा संपत यांनी चार पानी उत्तर देत मात्र हे आरोप फेटाळून लावले आहेत. न्यायालयात सादर केलेल्या नोटिसमध्ये एआर रेहमानने असोसिएशनशी कधीही कोणताही करार केला नसल्याचे म्हटले आहे. मात्र तरीही प्रसिद्धीसाठी त्यांची प्रतिष्ठा मलिन करण्याचे प्रयत्न सुरू असल्याचं सांगितलं आहे. इतकंच नव्हे तर रेहमान यांना यासाठी एडवांस म्हणून कोणतीही रक्कम मिळाली नसल्याचा दावा यात करण्यात आला आहे.

याबरोबरच रेहमान यांच्यावर जे आरोप लावले जात आहेत ते केवळ मीडियाचं लक्ष वेधून घेण्यासाठी केलं जात असल्याचंही त्यांनी स्पष्ट केलं आहे. त्यामुळे ASICON ने रहमान यांची जाहीर माफी मागावी अशी मागणी नर्मदा संपत यांनी केली आहे. याबरोबरच रेहमान यांना १५ दिवसांच्या आत १० कोटी रक्कम द्यावी असंही नोटिसमध्ये नमूद करण्यात आलं आहे.