बॉलीवूड अभिनेता आमिर खानच्या घरी सध्या आनंदाचे वातावरण आहे. लवकरच आमिरची लाडकी लेक आयरा लग्नबंधनात अडकणार आहे. आयरा मराठमोळा फिटनेस ट्रेनर नुपूर शिखरेबरोबर लग्नगाठ बांधणार आहे. आमिरच्या घरात सध्या लेकीच्या लग्नाची लगबघ सुरु आहे. त्यातच आता आमिरच्या घराचा घराचा व्हिडीओ समोर आला आहे.
गेल्या अनेक दिवसांपासून आयरा व नूपरच्या लग्नाची चर्चा सुरु होती. नोव्हेंबर २०२२ मध्ये आयरा व नुपूरने गुपचूप साखरपुडा उरकत सगळ्यांना आश्चर्याचा धक्का दिला होता. या साखरपुड्याचे फोटो सोशल मीडियावर मोठ्या प्रमाणात व्हायरल झाले होते. या साखरपुड्यानंतर दोघांच्या लग्नाच्या लग्नाची चांगलीच चर्चा रंगली होती. उद्या म्हणजेच ३ जानेवारीला आयरा व नुपूर लग्नबंधनात अडकणार आहेत. वांद्रे येथील ताज लँड अँड हॉटेलमध्ये दोघांच्या शाही लग्नसोहळ्याचे आयोजन करण्यात आले आहे.
लेकीच्या लग्नानिमित्त आमिर खानच्या घरी जय्यत तयारी करण्यात आली आहे. लग्नाअगोदर मुंबईतील आमिर खानच्या घराची सजावट करण्यात आली आहे. संपूर्ण रोषनाईने आमिरचे घर उजळून निघाले आहे. आमिरची पूर्वाश्रमीची पत्नी व आयराची आई रीना दत्ताच्या घरीही सजावट करण्यात आली आहे. या सजावटीचा व्हिडीओ सोशल मीडियावर व्हायरल झाला आहे. पारंपरिक महाराष्ट्रीय पद्धतीने आयरा व नुपूरचा लग्नसोहळा पार पडणार आहे. लग्नानंतर ६ ते १० जानेवारी दरम्यान दिल्लीत व जयपूरमध्ये रिसेप्शन पार्टीचे आयोजन करण्यात आले असल्याची माहिती समोर आली आहे. आमिरने स्वतः बी-टाऊनमधील कलाकारांना आपल्या लाडक्या लेकीच्या लग्नाचे आमंत्रण दिले आहे.
गेल्या दोन ते तीन वर्षांपासून दोघे एकमेकांना डेट करत आहेत. आयरा अनेकदा आपल्या सोशल मीडियावर नुपूरबरोबरचे फोटो शेअर करत असते. नुपूर एक प्रसिद्ध फिटनेस ट्रेनर असून अनेक सेलिब्रिटी मंडळींना तो फिटनेस ट्रेनिंग देतो. इटलीमध्ये झालेल्या ‘आयर्न मॅन, इटली’ स्पर्धेमध्येही तो सहभागी झाला होता. याच स्पर्धेदरम्यान त्याने सगळ्यांसमोर आयराला प्रपोज केले होते.
