ऑगस्ट महिना बॉलिवूडसाठी अत्यंत महत्त्वाचा असणार आहे. बऱ्याच मोठमोठ्या स्टार्सचे चित्रपट या महिन्यात प्रदर्शित होणार आहेत. ११ ऑगस्ट रोजी अक्षय कुमारचा 'ओह माय गॉड २' आणि सनी देओलचा 'गदर २' प्रदर्शित होणार आहे. या दोन्ही चित्रपटांची सध्या जबरदस्त हवा आहे. याबरोबरच आयुष्मान खुरानाचा 'ड्रीम गर्ल २'सुद्धा ऑगस्ट महिन्यातच येणार आहे. अशातच आता अभिषेक बच्चनच्या आगामी 'घुमर' चित्रपटाची चर्चा होऊ लागली आहे. आर बल्की दिग्दर्शित 'घुमर' या चित्रपटाचं नुकतंच पोस्टर प्रदर्शित झालं आहे. अभिषेक बच्चनने त्याच्या सोशल मीडिया हॅंडलवर हे पोस्टर शेअर केलं आहे. चित्रपट एका विकलांग खेळाडूच्या प्रेरणादायी जीवनप्रवासावर बेतलेला आहे. या महिला क्रिकेटपटूची भूमिका अभिनेत्री सैयामी खेर हीने निभावली आहे. आणखी वाचा : "मी फक्त बॉलिवूड स्टार नाही…" 'Y+' सुरक्षेवरुन भाष्य करणाऱ्या सुब्रमण्यम स्वामींना कंगना रणौतचं सडेतोड उत्तर नुकतंच चित्रपटाचे पोस्टर प्रदर्शित झाले असून यात संयामीचा एक हात नसूनही ती अत्यंत आत्मविश्वासाने दुसऱ्या हातात क्रिकेटचा बॉल घेऊन उभी असलेली दिसत आहे. या चित्रपटात अभिषेक बच्चन प्रशिक्षकाच्या भूमिकेत दिसणार आहे. पोस्टरमध्ये अभिषेकचा लूकही प्रेक्षकांना आवडला असून हा चित्रपट वास्तववादी परिस्थितीचं चित्रण करेल अशी अपेक्षा प्रेक्षकांना आहे. लवकरच या चित्रपटाचा ट्रेलर प्रदर्शित होण्याची शक्यता आहे. अभिषेकने याआधी आर. बल्की यांच्यासह 'पा' चित्रपटात काम केलं आहे. 'घुमर' हा चित्रपट १८ ऑगस्ट रोजी प्रेक्षकांच्या भेटीला येणार आहे. यामध्ये अभिषेक आणि सैयामीसह अंगद बेदी, शबाना आझमी यांच्यासारखे कलाकारही महत्त्वाच्या भूमिकेत दिसणार आहेत.
