‘हाऊसफुल ५’ चित्रपटाच्या शूटिंगदरम्यान अक्षय कुमारच्या डोळ्याला दुखापत

हिंदुस्तान टाइम्सने दिलेल्या वृत्तानुसार, चित्रपटासाठी अ‍ॅक्शन सीन शूट करत असताना अभिनेत्याच्या डोळ्याला लागले आहे. हवेने त्याच्या डोळ्यात एक बारीक वस्तू गेली, त्यामुळे त्रास होऊ लागला. अक्षयला त्रास सुरू झाल्यावर लगेचच चित्रपटाच्या सेटवर डॉक्टरांना बोलावण्यात आले. त्यांनी अक्षयवर उपचार केले असून त्याच्या डोळ्याला एक पट्टी बांधली आहे. तसेच काही वेळ त्याला आराम करण्यास सांगितले आहे.

हेही वाचा : शहनाज गिलने दिवंगत अभिनेता सिद्धार्थ शुक्लासाठी शेअर केली पोस्ट, ते दोन आकडे अन् चाहते म्हणाले…

डॉक्टरांनी दिलेल्या सल्ल्यानंतर अक्षय आराम करत आहे. ‘हाऊसफुल ५’ चित्रपटाच्या शूटिंगचे काम आता अंतिम टप्प्यात पोहचले आहे. त्यात अक्षयला दुखापत झाल्याने काम काही वेळ थांबले होते. मात्र, डॉक्टरांनी अक्षयला तपासल्यानंतर आणि त्याला आराम करण्यास सांगितल्यानंतर अन्य कलाकारांनी पुन्हा कामाला सुरुवात केली आहे.

चित्रपटाचं शूटिंग अंतिम टप्प्यात असल्याने अक्षयसुद्धा लवकरच त्याच्या कामाला सुरुवात करणार आहे. चित्रपटाच्या शूटिंगसह पुढील कामात कोणताही उशीर होऊ नये असं त्याला वाटतं, त्यामुळे लवकरच तो पुन्हा कामाला सुरुवात करणार आहे.

‘हाऊसफुल ५’ चित्रपटात पुन्हा एकदा अक्षय आणि रितेश देशमुख यांची जोडी एकत्र रुपेरी पडद्यावर पाहता येणार आहे. या चित्रपटात अभिषेक बच्चन, श्रेयस तळपदे, चंकी पांडे, जॅकलिन फर्नांडिस यांचा अभिनय पाहायला मिळणार आहे. तसेच नाना पाटेकर, जॉनी लिवर, जॅकी श्रॉफ, संजय दत्त आणि फरदीन खान हे कलाकारदेखील महत्त्वाचे पात्र साकारणार आहेत.

हेही वाचा : राजेश खन्नांपेक्षा शत्रुघ्न सिन्हा, संजीव कुमार वाईट होते, असं का म्हणाल्या शबाना आझमी?

या वर्षाच्या सुरुवातीलाच युरोपमध्ये ‘हाऊसफुल ५’ चित्रपटाच्या शूटिंगला सुरुवात झाली होती. आता शूटिंग अंतिम टप्प्यात असून ६ जून २०२५ ला हा चित्रपट प्रेक्षकांच्या भेटीला येणार आहे. २०१० पासून या कॉमेडी चित्रपटाच्या सीरिजने चाहत्यांना खळखळून हसवलं आहे. ‘हाऊसफुल’ आणि ‘हाऊसफुल २’ चित्रपटाचे दिग्दर्शन साजिद खान यांनी केले होते. पुढे २०२१६ मध्ये ‘हाऊसफुल ३’ व २०१९ मध्ये ‘हाऊसफुल ४’ प्रेक्षकांच्या भेटीला आला. आता तरुण मनसुखानी दिग्दर्शित ‘हाऊसफुल ५’ चित्रपट पाहण्यासाठी चाहते उत्सुक आहेत.