अनुपम खेर यांच्या मुंबईतील कार्यालयात चोरी! तिजोरी उचलून चोरट्यांनी काढला पळ, व्हिडीओ शेअर करत म्हणाले…

अनुपम खेर यांनी या पोस्टसह त्यांच्या कार्यालयातील दरवाजाचा व्हिडीओ देखील शेअर केला आहे. या प्रकरणी आता एफआयआर दाखल करण्यात आला असून लवकरच संबंधित चोरट्यांना पकडलं जाईल असं पोलिसांकडून सांगण्यात आलं आहे. अनुपम खेर यांच्या कार्यालयातून चोरट्यांनी तिजोरी आणि एक बॉक्स चोरी करून नेल्याचं समोर आलं आहे. खेर यांनी दिलेल्या माहितीनुसार यातील एका बॉक्समध्ये त्यांच्या चित्रपटासंदर्भातील काही गोष्टी ठेवण्यात आल्या होत्या. दोन चोरट्यांनी दरवाजा तोडून त्यांच्या कार्यालयात प्रवेश केला आणि ही चोरी केल्याची माहिती अभिनेत्याने या व्हिडीओमध्ये दिली आहे.

हेही वाचा : “पाठीवरुन हात फिरवला…”, नाना पाटेकरांना भेटून गौरव मोरे भारावला; फोटो शेअर म्हणाला…

अनुपम खेर सांगतात, “काल रात्री आमच्या वीरा देसाई परिसरातील कार्यालयात चोरी झाली. दोन चोरांनी माझ्या ऑफिसमध्ये बाहेरचा दरवाजा तोडून प्रवेश केला होता. आतमध्ये आल्यावर त्यांनी अकाउंट्स विभागातून आमची तिजोरी ( कदाचित हे चोर ती तिजोरी तोडू शकले नाहीत ) आणि एक बॉक्स चोरून नेला आहे. या बॉक्समध्ये आमच्या कंपनीने निर्मिती केलेल्या एका चित्रपटासंदर्भात काही गोष्टी होत्या. आमच्या कार्यालयाकडून या प्रकरणी एफआयआर दाखल करण्यात आला आहे. तसेच लवकरात लवकरच या चोरट्यांना पकडलं जाईल असं आश्वासन पोलिसांनी आम्हाला दिलं आहे. कारण, सीसीटीव्ही कॅमेऱ्यामध्ये हे दोन्ही चोर एका रिक्षात सामान ठेवत असल्याचं दृष्टीस पडत आहे. देव त्यांना सद्बुद्धी देवो…हा व्हिडीओ आमच्या कार्यालयातील कर्मचाऱ्यांनी पोलीस घटनास्थळी दाखल होण्यापूर्वी काढला होता.”

हेही वाचा : Bigg Boss OTT 3 : भव्य आरसा, प्रशस्त स्वयंपाकघर, बेडरूम अन्…; ‘बिग बॉस’च्या घराचे Inside फोटो आले समोर

दरम्यान, अनुपम खेर नेहमीच सोशल मीडियावर सक्रिय असतात. आपल्या वैयक्तिक आणि व्यावसायिक जीवनाशी संबंधित फोटो आणि व्हिडिओ ते चाहत्यांबरोबर शेअर करत असतात. गेल्या ४० वर्षांपासून ते बॉलीवूडमध्ये काम करत आहेत. १९८४ मध्ये आलेला ‘सारांश’ हा त्यांचा पहिला चित्रपट होता. येत्या काळात ते ‘मेट्रो इन दिन’, ‘फतेह सिंग’, ‘अलर्ट 24*7’ या चित्रपटांमध्ये ते झळकणार आहेत.