तुम्हाला अभिनेता हरमन बावेजा आठवतोय का? प्रेक्षक हरमनला अभिनेता म्हणून कमी आणि हृतिकसारखा दिसणारा हिरो म्हणून अधिक ओळखतात. हरमनने ‘लव्ह स्टोरी २०५०’ मधून बॉलीवूडमध्ये पदार्पण केले होते. या सिनेमात त्याच्यासोबत प्रियांका चोप्राही होती. खरं तर हा चित्रपट बॉक्स ऑफिसवर आपटला होता. मात्र प्रियांका आणि त्याची लव्ह स्टोरी चांगलीच गाजली. परंतु हे नातं फार काळ टिकू शकलं नाही. विशेष म्हणजे बऱ्याच काळानंतर हरमनने याविषयीचं मौन सोडलं असून ब्रेकअपमागचं कारण सांगितलं.
एका मुलाखतीमध्ये हरमनने प्रियांका आणि त्याच्या नात्याविषयी अनेक गोष्टींचा खुलासा केला. “त्या वेळी माझे चित्रपट बॉक्स ऑफिसवर अपयशी ठरत होते त्यामुळे माझ्यावर प्रचंड ताण येत होता त्यामुळे मला माझं सारं लक्ष चित्रपटांवर केंद्रित करायचं होतं. या साऱ्या गडबडीमध्ये मला प्रियांकालादेखील वेळ देण्यास जमत नव्हतं,” असं हरमनने सांगितलं.
पुढे हरमन म्हणला, “लव्ह स्टोरी २०५०’ अपयशी ठरल्यानंतर मला ‘वॉट्स यूआर राशी’ या चित्रपटाकडे विशेष लक्ष द्यायचं होतं. या चित्रपटात माझी महत्त्वाची भूमिका होती. त्यातच चित्रपटाचे दिग्दर्शक आशुतोष गोवारीकर यांनीही मला चित्रपटावर लक्ष केंद्रित करण्यास सांगितलं होतं. प्रियांका मला त्या वेळी सतत वेळ देण्यास सांगत होती. मात्र मला त्या वेळी ते शक्य नव्हतं. त्यामुळेच आमच्या नात्यात दुरावा आला. . खरं तर आशु सर (आशुतोष गोवारीकर) मला सांगायचे, ‘कोणत्याही व्यक्तीला त्याची स्पेस द्यावी.’ पण मी असं काही केलं नाही. मी सर्व मर्यादा ओलांडल्या, असं हरमन म्हणाला.
हरमनने ‘व्हॉट्स युवर राशी’ आणि ‘व्हिक्ट्री’सारखे सिनेमे केले. पण हे दोन्ही सिनेमे बॉक्स ऑफिसवर आपटले होते. त्यामुळे त्याचं सिनेकरिअर हे तीन सिनेमांपूरतच मर्यादित राहीलं. त्यानंतर हर्मन फारसा कुठेच दिसला नाही. २०१४ मध्ये त्याने ‘ढिश्कियाव’ या सिनेमातून पुनरागमन करण्याचा प्रयत्न केला. पण हा सिनेमाही फार चालला नव्हता.