ओम राऊत दिग्दर्शित ‘आदिपुरुष’ हा चित्रपट चार दिवसांपूर्वी प्रदर्शित झाला. हा चित्रपट पाहून प्रेक्षक नाराज झाले आहेत. या चित्रपटावर सर्वत्र टीका केली जात आहे. प्रेक्षकांबरोबरच अनेक कलाकारांनीदेखील या चित्रपटाबाबत नाराजी व्यक्त केली. आता अशातच एका बॉलीवूड अभिनेत्याने या चित्रपटामुळे ओम राऊत करिअर संपलं, असं म्हटलं आहे.
‘आदिपुरुष’मध्ये दाखवलेली दृश्यं, या चित्रपटातील कलाकारांचा अभिनय, चित्रपटातील संवाद, या चित्रपटाचे व्हीएफएक्स या सगळ्या वरच टीका केली जात आहे. हा चित्रपट आतापर्यंतचा सर्वात जास्त निराशाजनक चित्रपट आहे, असं अनेकजण म्हणत आहेत. अशातच आता अभिनेता, निर्माता, चित्रपट समीक्षक केआरके म्हणजेच कमाल आर खान याने केलेलं एक ट्वीट चर्चेत आलं आहे.
‘आदिपुरुष’ प्रदर्शित होण्यापूर्वी कमाल आर खान या चित्रपटाचं कौतुक करत होता. पण हा चित्रपट पाहिल्यावर त्याने यू-टर्न घेतला. आता तो ‘आदिपुरुष’वर टीका करत आहे. तर आता ओम राऊतला त्याने लक्ष केलं आहे. एक ट्वीट करत त्याने लिहिलं, “‘आदिपुरुष’ हा ओम राऊतच्या करिअरमधील शेवटचा चित्रपट आहे. तर ‘बवाल’ हा चित्रपट नितेश तिवारी यांच्या करिअरचा शेवटचा चित्रपट आहे. दोघांचे अभिनंदन!” आता त्याचं हे ट्वीट चांगलंच चर्चेत आलं असून त्यावर नेटकरी विविध प्रतिक्रिया देत आहेत.
दरम्यान, ‘आदिपुरुष’ या चित्रपटाने पहिल्या तीन दिवसांत जगभरातून ३४० कोटींची कमाई केली. परंतु काल या चित्रपटाला खूप मोठा फटका बसला. पहिले तीन दिवस रोज ५० ते ६० कोटी कमावणाऱ्या या चित्रपटाच्या हिंदी व्हर्जनने काल फक्त ९ ते १० कोटींचा गल्ला जमवला. त्यामुळे आता प्रेक्षक या चित्रपटाकडे पाठ फिरवत असल्याचं चित्र दिसत आहे.
