वीर सावरकरांना भारतरत्न देण्यात यावा का? अभिनेता रणदीप हुड्डाने दिलं चोख उत्तर; म्हणाला…

गेल्यावर्षी या चित्रपटाचा टीझर लोकांसमोर आला. तेव्हापासूनच या चित्रपटाची प्रेक्षक आतुरतेने वाट बघत होते. आता पाठोपाठ या चित्रपटाचा दमदार ट्रेलरसुद्धा प्रेक्षकांच्या भेटीला आला आहे. टीझरप्रमाणेच ट्रेलरही प्रेक्षकांची उत्सुकता वाढवणाराच आहे. ट्रेलरमध्ये स्वातंत्र्यवीर सावरकर यांच्या जीवनातील मुख्य घटनांवर आणि स्वातंत्र्यलढ्यातील त्यांच्या योगदानावर प्रामुख्याने प्रकाश टाकण्यात आला आहे. चित्रपटात दमदार संवाद आपल्याला ऐकायला मिळणार आहेत याची झलकही ट्रेलरमध्ये दिसली आहे.

सध्या रणदीप हुड्डा या चित्रपटाच्या प्रमोशनमध्ये व्यस्त आहे. वेगवेगळ्या मीडिया प्लॅटफॉर्मवर रणदीप मुलाखतीमध्ये त्याच्या या चित्रपटावर काम करण्याच्या अनुभवाबद्दल भाष्य करत आहे. नुकतंच रणदीपने ‘एबीपी न्यूज’च्या एका कार्यक्रमात हजेरी लावली. या कार्यक्रमात या चित्रपटाविषयी अन् सावरकर यांच्या विचारधारेविषयी अन् एकूणच त्यांच्यावर होणाऱ्या आरोपांबद्दल विचारण्यात आलं. त्यावेळी रणदीप या सगळ्या प्रश्नांची अगदी चोख उत्तरं दिली.

आणखी वाचा : अनुपम खेर ‘या’ चित्रपटातून दिग्दर्शक म्हणून करणार कमबॅक; वाढदिवशी अभिनेत्याने दिलं चाहत्यांना सरप्राइज

स्वातंत्र्यवीर सावरकर यांना भारतरत्न द्यावा ही मागणी बऱ्याचदा होताना दिसते. राजकीय वर्तुळामध्ये तर यावरुन बऱ्याचदा वाद झालेले आपण पाहिले आहेत. रणदीपला या मुलाखतीदरम्यान हाच प्रश्न विचारण्यात आला. “सावरकरांना भारतरत्न मिळायला हवा का?” या प्रश्नाचं उत्तर देताना रणदीप म्हणाला, “होय, वीर सावरकरांना भारतरत्न हा पुरस्कार अवश्य मिळायला हवा. माझी इच्छा आहे की लोकांनी हा चित्रपट पहावा अन् त्यानंतर सावरकरजी यांना भारत्न देण्यात यावा यासाठी साऱ्या देशभरातून एक चळवळ उभी राहावी.”

याबरोबरच इतरही बऱ्याच प्रश्नांची रणदीपने अगदी सडेतोड उत्तरं दिली. या चित्रपटाचा ट्रेलर सोशल मीडियावर चांगलाच चर्चेत आहे. ट्रेलर पाहून या चित्रपटाला राष्ट्रीय पुरस्कार मिळायला हवा अशी इच्छा लोकांनी व्यक्त करायला सुरुवात केली आहे. झी स्टुडिओज, आनंद पंडित, संदीप सिंह आणि रणदीप हुड्डा यांनी मिळून या चित्रपटाची निर्मिती केली आहे तर उत्कर्ष नैथानी व रणदीप यांनी मिळून याचे संवाद लिहिले आहेत. ‘स्वातंत्र्यवीर सावरकर’ हा चित्रपट २२ मार्च रोजी चित्रपटगृहात झळकणार आहे.