Bollywood Actor Saif Ali Khan Attacked With Sharp Weapon At Home: अभिनेता सैफ अली खान दरोडेखोराच्या हल्ल्यात गंभीर जखमी झाला आहे. आज (गुरुवार, १६ जानेवारी) मध्यरात्री सैफच्या मुंबईतील वांद्रे (पश्चिम) येथील घरात एक दरोडेखोर घुसला होता. त्याच्याबरोबर झालेल्या झटापटीत सैफला दुखापत झाली आहे. या घटनेबाबत सैफ अली खानच्या वतीने त्याच्या टीमने अधिकृत निवेदन दिलं आहे.
अभिनेता सैफ अली खानच्या टीमने अभिनेत्यावर मुंबईत त्याच्या घरी झालेल्या हल्ल्याबद्दल अधिकृत निवेदन जारी केलं आहे. “सैफ अली खानच्या घरी निवासस्थानी दरोड्याचा प्रयत्न झाला होता. तो सध्या रुग्णालयात असून शस्त्रक्रिया सुरू आहे. पोलीस या प्रकरणाचा तपास करत आहेत,” असं निवेदनात म्हटलं आहे.
हेही वाचा – “त्याच्या गृहसेविकेबरोबर वाद…”, सैफ अली खानवर झालेल्या हल्ल्याप्रकरणी पोलिसांची पहिली प्रतिक्रिया
हेही वाचा – मोठी बातमी! अभिनेता सैफ अली खानवर चाकू हल्ला, वांद्रेतील घरात मध्यरात्री घडली घटना
सैफ अली खानवर झालेल्या हल्ल्याचा तपास मुंबई पोलीस करत आहेत. गुरुवारी रात्री अभिनेता सैफ अली खानच्या घरात एक अज्ञात माणूस घुसला, त्याने त्याच्या घरात काम करणाऱ्या गृहसेविकेबरोबर वाद घातला. नंतर सैफने हस्तक्षेप करून त्याला शांत करण्याचा प्रयत्न केला, तेव्हा त्याने सैफवर हल्ला केला. या घटनेत सैफ जखमी झाला आहे, पोलीस या प्रकरणाचा तपास करत आहेत, अशी माहिती मुंबई पोलिसांनी दिली.
सैफ अली खान या हल्ल्यात गंभीर जखमी झाला आहे. त्याला पहाटे लीलावती रुग्णालयात दाखल करण्यात आलं. सैफच्या मानेला व मणक्याला जखमा झाल्या आहेत. “सैफवर त्याच्या घरात अज्ञात व्यक्तीने हल्ला केला. त्याला पहाटे साडेतीन वाजता लीलावती रुग्णालयात आणण्यात आलं. त्याला सहा जखमा झाल्या आहेत, त्यापैकी दोन जखमा खोल आहेत. एक जखम त्याच्या मणक्याजवळ झाली आहे. आम्ही त्याच्यावर शस्त्रक्रिया करत आहोत,” असं लीलावती रुग्णालयाचे सीओओ डॉ निरज उत्तमानी म्हणाले.
