बॉलीवूडचा सुपस्टार म्हणून शाहरुख खानला ओळखले जाते. आपल्या अभिनयाच्या जोरावर शाहरुखने बॉलीवूडमध्ये वेगळं स्थान निर्माण केलं आहे. २०२३ वर्ष शाहरुखसाठी खूप चांगलं गेलं. त्याच्या ‘पठाण ‘आणि ‘जवान’ चित्रपट बॉक्स ऑफिसवर सुपरहिट ठरले. उद्या २ नोव्हेंबरला शाहरुख खान आपला ५८ वा वाढदिवस साजरा आहे. या वाढदिवसानिमित्त खास पार्टीचे आयोजन करण्यात आलं आहे. तसेच शाहरुखच्या वाढदिवसाच्या दिवशी चाहत्यांना खास सरप्राईज मिळणार आहे.
वाढदिवसानिमित्त मोठ्या पार्टीचं आयोजन
मिळालेल्या माहितीनुसार शाहरुखचा वाढदिवस मोठ्या स्वरुपात साजरा कऱण्यात येणार आहे. शाहरुखच्या वाढदिवसानिमित्त बांद्रा येथील नीता अंबानींच्या क्लचरल सेंटर (NMACC) मध्ये मोठ्या पार्टीचे आयोजन करण्यात आलं आहे. या पार्टीमध्ये करण जोहर, दीपिका पादुकोण, आलिया भट्ट, राजकुमार हिराणी, एटली, सिद्धार्थ आनंद यांच्याबरोबर बॉलीवूडचे अनेक सेलिब्रिटी सहभागी होणार आहेत.
चाहत्यांसाठी खास सरप्राईज
मिळालेल्या माहितीनुसार शाहरुख त्याच्या वाढदिवसाच्या दिवशी ‘डंकी’ चित्रपटाचा टीझर प्रदर्शित करणार आहे. ‘पठाण’ आणि ‘जवान’ला मिळालेल्या यशानंतर चाहते शाहरुखच्या ‘डंकी’ चित्रपटाची आतुरतेने वाट पाहत आहेत. राजकुमार हिराणी यांनी या चित्रपटाचे दिग्दर्शन केलं आहे. शाहरुख आणि राजकुमार हिराणी पहिल्यांदा एकत्र काम करत आहेत.
हेही वाचा- जावई केएल राहुल नव्हे तर सुनील शेट्टीला आवडतो ‘हा’ खेळाडू, भर कार्यक्रमात अण्णाने केला खुलासा
शाहरुखच्या वर्कफ्रंटबाबत बोलायचं झालं तर काही दिवसांपूर्वी त्याचा ‘जवान’ चित्रपट प्रदर्शित झाला. जगभरात या चित्रपटाने जबरदस्त कमाई केली होती. १००० कोटींपेक्षा अधिकची कमाई करत या चित्रपटाने अनेक रेकॉर्ड तोडले होते. आता शाहरुखचा ‘डंकी’ चित्रपट लवकरच प्रेक्षकांच्या भेटीला येणार आहे
