Pushpa 2 teaser: ‘पुष्पा २’चा टीझर शेअर करत श्रेयस तळपदेची खास पोस्ट, म्हणाला…

श्रेयस तळपदेने ‘पुष्पा’ चित्रपटातील अल्लू अर्जुनने साकारलेल्या ‘पुष्पा’ या भूमिकेला हिंदी व्हर्जनसाठी आवाज दिला होता. श्रेयस तळपदे याने केलेल्या या कामाचं खूप कौतुक झालं. आता या चित्रपटाच्या दुसऱ्या भागामध्येही पुष्पा या भूमिकेसाठी आपल्याला श्रेयस तळपदेचा आवाज ऐकू येणार आहे. आज अल्लू अर्जुनच्या वाढदिवसानिमित्त श्रेयसने हा टीझर शेअर करत त्याचा या चित्रपटासाठी डबिंग करण्याचा अनुभव शेअर केला आहे.

आणखी वाचा : महागड्या गाड्या, आलिशान घर अन्…; ‘पुष्पा’ खऱ्या आयुष्यात आहे ‘इतक्या’ संपत्तीचा मालक, आकडा वाचून व्हाल थक्क

आज श्रेयस तळपदेने ‘पुष्पा २चा हिंदी टीझर त्याच्या सोशल मीडिया अकाउंटवर शेअर केला. या टीझरमध्ये ‘पुष्पा’ तिरुपती तुरुंगातून फरार असल्याचं दाखवण्यात आलं आहे. तर यामुळे शहरात दंगलीसदृश परिस्थिती निर्माण झाली असून सर्वांना एकाच प्रश्न पडला आहे की “पुष्पा कुठे आहे?” एकीकडे पोलीस पुष्पाला शोधताना दिसत आहेत, तर दुसरीकडे लोक पुष्पाने त्यांना मदत केल्याबद्दल त्याचं कौतुक करताना दिसत आहेत. या टीझरच्या अखेरीस या अल्लू अर्जुनचीही झलक दिसते.

हेही वाचा : Pushpa 2 Teaser: दंगली, जाळपोळ, पुष्पाचा शोध अन्…; ‘पुष्पा २’चा उत्कंठावर्धक टीझर प्रदर्शित

हा टीझर शेअर करत श्रेयसने लिहिलं, “अब रुल पुष्पा का… और पुष्पा कभी झुकेगा नही साला… अल्लू अर्जुनजी, वाढदिवसाच्या खूप खूप शुभेच्छा. तुमचा हा दिवस आणि येणारी सगळी वर्ष या टीझरसारखीच जबरदस्त जावो. एक दिवस मी ती शेवटची ओळ डब करण्यासाठी गेलो आणि पुन्हा सर्व आठवणी माझ्या मनात जाग्या झाल्या. काय सुरेख अनुभव होता तो!” आता त्याची ही पोस्ट खूप चर्चेत आली असून त्याचे चाहते ‘पुष्पा २’बद्दल उत्सुकता व्यक्त करत आहेत.