बॉलीवूडमधील प्रसिद्ध ऑनस्क्रीन जोडी अजय देवगण आणि तब्बू हे ‘औरों में कहां दम था’ या चित्रपटातून प्रेक्षकांच्या भेटीला आले आहेत. याआधी या दोघांची मुख्य भूमिका असलेल्या चित्रपटांना प्रेक्षकांचा मोठा प्रतिसाद मिळाल्याचे पाहायला मिळाले होते. मात्र, यावेळी असे घडताना दिसले नाही. अजय देवगण आणि तब्बू यांची मुख्य भूमिका असलेला हा चित्रपट बॉक्स ऑफिसवर कमाल दाखवू शकला नाही.
‘औरों में कहा दम था’ चित्रपटाने सोमवारी केली इतकी कमाई
आता ‘औरों में कहा दम था’ या चित्रपटाने ५ ऑगस्टला म्हणजेच सोमवारी केलेली कमाई ही फक्त १.०४ कोटी रुपये इतकी आहे. ही रक्कम जवळजवळ रविवारी केलेल्या कमाईपेक्षा ६२.१८ टक्क्यांनी कमी आहे. मात्र, सुधांशू सारीया दिग्दर्शित ‘उलझ’ या चित्रपटाची कमाई यापेक्षाही कमी आहे. ‘उलझ’ चित्रपटाने सोमवारी फक्त ५७ लाख रुपयांची कमाई केली आहे.
समोर आलेल्या माहितीनुसार, ‘औरों में कहा दम था’ हा चित्रपट १०० कोटी रुपयांच्या बजेटमध्ये बनवला गेला आहे. या चित्रपटाने भारतात आतापर्यंत ७.७९ कोटी रुपयांची कमाई केली आहे, तर जगभरात ९.५ कोटी रुपयांची कमाई केली आहे. या चित्रपटाने प्रदर्शित झालेल्या दिवशी फक्त १.८५ कोटी रुपयांची कमाई केली होती. अजय देवगणच्या या चित्रपटाची १५ वर्षांतील ही सर्वात कमी ओपनिंग मानली जात आहे. नीरज पांड्ये यांनी दिग्दर्शित केलेल्या ‘औरों में कहां दम था’ या चित्रपटाची अक्षय कुमारच्या ‘सरफिरा’ या चित्रपटापेक्षा वाईट सुरुवात झाल्याचे म्हटले जात आहे.
या चित्रपटाबरोबरच नुकत्याच प्रदर्शित झालेल्या ‘उलझ’ या चित्रपटाकडेदेखील प्रेक्षकांनी पाठ फिरवल्याचे दिसत आहे. ‘उलझ’ हा चित्रपट सुधांशू सारीया यांनी दिग्दर्शित केला असून जान्हवी कपूर, रोशन मॅथ्यू हे कलाकार प्रमुख भूमकेत दिसत आहेत.
दरम्यान, २ ऑगस्टला प्रदर्शित झालेल्या ‘औरों में कहां दम था’ या चित्रपटात अजय देवगण आणि तब्बू यांच्याशिवाय शांतनु माहेश्वरी, जिमी शेरगील आणि महेश मांजरेकर यांची मुलगी सई मांजरेकर महत्त्वाच्या भूमिकेत दिसले आहेत. ‘आरआरआर’ चित्रपटातील संगीत दिग्दर्शन केलेले एम. एम. किरवाणी यांनी या चित्रपटालादेखील म्युझिक दिग्दर्शन केले आहे. आता हा चित्रपट आणखी किती कमाई करणार हे पाहणे महत्त्वाचे ठरणार आहे.
