अभिनेता अक्षय कुमार व रवीना टंडन यांची लव्ह स्टोरी आणि ब्रेकअप हे बॉलिवूडमधील चर्चेतलं प्रकरण आहे. दोघांच्या ब्रेकअपला दोन दशकांपेक्षा जास्त काळ उलटला आहे, त्यानंतर दोघांनीही वेगवेगळ्या व्यक्तींशी लग्नगाठ बांधली व आयुष्यात पुढे गेले. ब्रेकअपनंतर इतक्या वर्षांनी पहिल्यांदाच रवीना व अक्षय यांना एकत्र पाहण्याची संधी चाहत्यांना मिळाली.
हेही वाचा – ‘The Kerala Story’च्या कमाईत तिसऱ्या दिवशी मोठी वाढ; जमवला तब्बल ‘इतक्या’ कोटींचा गल्ला
रवीना टंडन व अक्षय कुमार यांनी एका अवॉर्ड शोला हजेरी लावली. यावेळी ते दोघेही मंचावर एकत्र दिसले. इतकंच नव्हे तर त्यांनी एकमेकांना मिठी मारून भेट घेतली व ते गप्पा मारतानाही दिसले. या शोमध्ये अक्षय कुमारला ‘मोस्ट स्टायलिश मॅन २०२३’ चा पुरस्कार देण्यात आला. ते देण्यासाठी रवीना टंडन मंचावर आली. अक्षय पुरस्कार घेण्यासाठी मंचावर आला, त्यावेळी त्याने रवीनाला मिठी मारली. यानंतर रवीनाने अक्षय कुमारला हा पुरस्कार प्रदान केला.
अक्षय कुमार आणि रवीना टंडनचा एक व्हिडीओही सोशल मीडियावर व्हायरल होत आहे. ज्यामध्ये दोघे एकत्र गप्पा मारताना दिसत आहेत. यात रवीना अक्षयला काहीतरी म्हणते तिथे अक्षय मान हलवून हो म्हणताना दिसतो.
अक्षय आणि रवीना १९९४ मध्ये आलेल्या ‘मोहरा’ चित्रपटात एकत्र दिसले होते. यानंतर १९९५ मध्ये त्यांच्या डेटींगच्या बातम्या खूप चर्चेत होत्या. दोघांनी मंदिरात साखरपुडा केल्याचीही बातमी समोर आली होती. पण हे नातं फार काळ टिकलं नाही. अक्षयची रेखा यांच्याशी जवळीक वाढल्याच्या चर्चा होत्या. रवीनाला हे अजिबात आवडलं नव्हतं, त्यानंतर तिचं रेखा यांच्याशी भांडणही झाल्याचं म्हटलं जातं. ब्रेकअपनंतर रवीना आणि अक्षय कधीही एकत्र दिसले नाहीत. पण या शोच्या निमित्ताने त्यांच्या चाहत्यांना या दोघांना इतक्या वर्षांनंतर एकत्र पाहता आलं.
