बॉलिवूड अभिनेत्री आलिया भट्ट ही कायमच विविध कारणांमुळे चर्चेत असते. आलिया भट्टने तिच्या अभिनयाच्या जोरावर सिनेसृष्टीत एक वेगळे स्थान निर्माण केले आहे. आलिया भट्टने ६ नोव्हेंबर २०२२ ला गोंडस मुलीला जन्म दिला. आलिया-रणबीरने त्यांच्या लेकीचं नाव ‘राहा’ असं ठेवलं आहे. राहाच्या जन्मानंतर आलियाने तिचं वजन कसं कमी केलं, याबद्दल तिने भाष्य केले आहे.
आलियाने गरोदरपणानंतर फार कमी वेळात तिचे वजन घटवले आहे. त्यामुळे तिच्या डाएट प्लॅनची सतत चर्चा पाहायला मिळते. नुकतंच आलियाने राहाच्या जन्मानंतर वजन कसे कमी केले, याबद्दल खुलासा केला आहे.
“मी जेव्हा राहाला जन्म दिला तेव्हा मी माझ्या शरीराबद्दल इतकी कठोर नव्हते. माझ्याकडे पाहून प्रत्येकाला वाटते की मी माझे वजन नैसर्गिकरित्या कमी केलेले नाही. पण राहाच्या जन्मानंतर मी स्वत:वर कोणतीही बंधन घातली नाही. त्यावेळी मला डॉक्टरांनी सल्ला दिला होता की, तू १२ आठवड्यानंतर वर्कआऊट करु शकते. त्या वर्कआऊटमध्ये तू खूप मेहनत कर आणि मी तसेच केले”, असे आलिया म्हणाली.
“माझे वजन अजूनही पूर्ववत झालेले नाही. पण मी माझे वजन नैसर्गिकरित्याच कमी केले आहे. मी १५ मिनिटे चालणे, दीर्घ श्वास घेणे आणि व्यायाम करणे असे सर्व सुरुवातीच्या दिवसात केले. याकाळात माझ्या सासूने माझ्यासाठी डिंकाचे लाडू बनवले होते. हे लाडू मी सहा आठवडे खाल्ले. त्यामुळे लोकांनी हे समजून घेणं गरजेचे आहे की, गरदोरपणात किंवा बाळाच्या जन्मानंतर वजन वाढणं हे जास्त खाल्ल्यामुळे होत नाही”, असा सल्लाही आलियाने दिला.
आलिया व रणबीरने १४ एप्रिल २०२२ रोजी लग्नगाठ बांधत नव्या आयुष्याला सुरुवात केली. त्यानंतर काहीच महिन्यांत त्यांनी आई-बाबा होणार असल्याची गूडन्यूज चाहत्यांना दिली. आलिया भट्टने ६ नोव्हेंबर २०२२ वाजता तिने एका गोंडस बाळाला जन्म दिला. आलिया आणि रणबीरला कन्यारत्न प्राप्त झाले. काहीच दिवसांपूर्वी त्यांच्या लग्नालाही एक वर्ष पूर्ण झाले.
