हिंदी चित्रपटसृष्टीतील ज्येष्ठ अभिनेत्री नीतू कपूर आज त्यांचा ६५ वा वाढदिवस साजरा करीत आहेत. वाढदिवसानिमित्त नीतू कपूर यांना बॉलीवूड कलाकार तसेच कपूर कुटुंबीयांकडून शुभेच्छा दिल्या जात आहेत. लाडक्या सासूच्या वाढदिवसानिमित्त आलिया भट्टने सुद्धा खास इन्स्टाग्राम स्टोरी शेअर केली आहे.
आलिया भट्ट आणि नीतू कपूर या दोघीही एकमेकींचे अनेकदा कौतुक करताना दिसतात. “आलिया माझी सून नाही मुलगी आहे.” असे नीत कपूर यांनी अनेक मुलाखतींमध्ये सांगितले आहे. सासूच्या ६५ व्या वाढदिवसानिमित्त आलियाने खास फोटो शेअर करत त्यांना शुभेच्छा दिल्या आहेत.
आलिया फोटो शेअर करत लिहिते, “वाढदिवसाच्या खूप खूप शुभेच्छा क्वीन…तुम्ही सुंदर आहात, प्रत्येक गोष्ट सुंदर बनवता, आय लव्ह यू खूप खूप प्रेम.” आलिया भट्टप्रमाणे नीतू कपूर यांची मुलगी आणि रणबीर कपूरची मोठी बहीण रिद्धीमाने सुद्धा आईच्या वाढदिवसानिमित्त पूर्ण कुटुंबाचा खास फोटो शेअर केला आहे.
हेही वाचा : ‘आदिपुरुष’चे लेखक मनोज मुंतशीर यांनी जनतेची मागितली जाहीर माफी; म्हणाले, “मी हात जोडून…”
रिद्धीमाने शेअर केलेल्या फोटोमध्ये नीतू खुर्चीवर बसल्या असून, यामध्ये रणबीर कपूर, रिद्धीमासह तिचा पती भरत साहनी आणि मुलगी अनायरा दिसत आहेत. फोटोच्या कॅप्शनमध्ये रिद्धीमा लिहिते, “आई…तुला वाढदिवसाच्या खूप खूप शुभेच्छा, तू आमच्या कुटुंबाचा एक आधार आहे. आलिया तुला आणि बेबी राहाला आम्ही प्रचंड मिस करत आहोत.”
नीतू कपूर सध्या इटलीमध्ये कुटुंबीयांबरोबर सुट्ट्यांचा आनंद घेत आहेत. तिथेच त्यांनी त्यांचा वाढदिवस साजरा केला. यावेळी रणबीर कपूर आईच्या वाढदिवसाला उपस्थित होता. मात्र, आलिया भट्ट कामानिमित्त सासूच्या वाढदिवसाला उपस्थित राहू शकली नाही.
