“हृतिकवर कोणालाच विश्वास नव्हता…” अमिषा पटेलने सांगितल्या ‘कहो ना प्यार है’दरम्यानच्या आठवणी

या चित्रपटामुळे हृतिक रोशन आणि अमिषा पटेल हे दोघे रातोरात स्टार झाले. अभिनेत्री अमिषा पटेल सध्या ‘गदर २’मुळे चांगलीच चर्चेत. नुकतंच तिने एका मुलाखतीदरम्यान या ‘गदर – एक प्रेम कथा’ आणि ‘कहो ना प्यार है’ दरम्यानच्या शूटिंगचे वेगवेगळे किस्से शेअर केले आहेत. हे दोन्ही चित्रपट एकत्र चित्रीत करताना तिला आलेले अनुभव तिने शेअर केले आहेत.

आणखी वाचा : सप्टेंबर महिन्यात OTT चाहत्यांसाठी पर्वणी; ‘हे’ चित्रपट आणि वेबसीरिज करतील तुमचं भरपूर मनोरंजन

बॉलिवूड बबलशी संवाद साधताना अमिषा म्हणाली. “कहो ना प्यार है दरम्यान कोणालाच हृतिकवर विश्वास नव्हता. अमिताभ बच्चन यांचा मुलगा, तसेच फिरोज खान यांचा मुलगाही चित्रपटसृष्टीत आला होता. ही सगळीच मातब्बर कलाकारांची मुलं होती. इतकंच नव्हे तर खुद्द राकेश रोशन यांनाही हृतिकवर फारसा विश्वास नव्हता.”

याबरोबरच ‘कहो ना प्यार है’ हा चित्रपट आमिर खान आणि शाहरुख खानच्या चित्रपटांबरोबर येऊ नये यासाठी राकेश रोशन यांनी पूर्णपणे खबरदारी घेतल्याचंही अमिषाने सांगितलं. याचदरम्यान शाहरुख खानचा ‘फिर भी दिल है हिंदुस्तानी’ आणि आमिर खानचा ‘मेला’ हे दोन्ही चित्रपट आले. हे दोन्ही चित्रपट फ्लॉप झाले, पण हृतिक आणि अमिषाच्या ‘कहो ना प्यार है’ या चित्रपटाने बॉक्स ऑफिसवर इतिहास रचला.