रुपेरी पडद्यावर मोठं नाव कमावण्याचं स्वप्न उराशी घेऊन अनेक तरुण कलाकार बॉलीवूडमध्ये येतात. मात्र, यातील सर्वच कलाकार सुपरस्टार होतात असे नाही. काहींना यशाचं शिखर गाठण्यासाठी आधी खडतर प्रवास करावा लागतो. या प्रवासातून विजय मिळवणारा खरा सुपरस्टार म्हणून ओळखला जातो. अशात बॉलीवूड अभिनेत्री अमीषा पटेलने बॉलीवूड सुपरस्टार तसेच येथे असलेल्या अनेक आव्हानांवर मत व्यक्त केलं आहे.
अमीषा पटेल नुकतीच ‘गदर २’ या चित्रपटात दिसली. या चित्रपटाने तिला पुन्हा एकदा मोठी प्रसिद्धी मिळवून दिली आहे. अमीषाने इंडिया टुडेला मुलाखत दिली आहे. या मुलाखतीमध्ये तिने बॉलीवूडची सध्याची परिस्थिती, येथे येणारी आव्हाने, सुपरस्टारसमोर असलेल्या अडचणी, कलाकारांची उल्लेखनीय कामगिरी या सर्वांवर उघडपणे भाष्य केलं आहे.
अमीषा सुपरस्टारबद्दल बोलताना म्हणाली, “सलमान खान, शाहरुख खान, आमिर खान या कलाकारांनंतर रणबीर कपूर, हृतिक आणि कार्तिक आर्यन निश्चितपणे बॉलीवूडचा वारसा पुढे नेतील. त्यानंतर इथेच याचा अंत होईल असं मला वाटतं. हे काही निवडक कलाकार प्रत्यक्षात सिनेविश्वात काहीतरी नवीन करून दाखवण्याचे धाडस ठेवतात. त्यांच्यानंतर बॉलीवूडचं काय होणार याचा विचार करणंसुद्धा भितीदायक आहे.”
अमीषाने पुढे कलाकारांवर असलेल्या दबावाबद्दल आणि जास्तीच्या अपेक्षेबद्दलही मत व्यक्त केलं आहे. ती म्हणाली, “जेव्हा शाहरुख खान, सनी देओल, अजय देवगण, सलमान खान, रणबीर कपूर आणि हृतिक रोशन एखादा चित्रपट करतात, त्यावेळी त्यांच्या आधीच्या चित्रपटापेक्षा हा चित्रपट आणखी जास्त ब्लॉकबस्टर आणि सुपरहिट होईल अशी अपेक्षा अनेकांना असते. मात्र, प्रत्येक चित्रपट अशा पद्धतीने यश मिळवेलच असं नाही. प्रत्येकवेळी एका चित्रपटानंतर दुसरा चित्रपटसुद्धा तितकाच मोठा होईल हे अशक्य आहे, असं यश फार क्वचित व्यक्तींना मिळतं. प्रत्येक चित्रपट ब्लॉकबस्टर होऊ शकत नाही.”
अमीषाने मुलाखतीत पुढे काही कलाकारांचं कौतुकही केलं आहे. “आयुष्मान खुरानाने आव्हानात्मक भूमिका स्वीकारल्या आहेत. कार्तिक आर्यन सातत्याने सुपरहिट चित्रपट करत आहे, तर राजकुमार रावही परिघाबाहेर जाऊन काम करत आहे.”
अमीषाच्या कामाबद्दल
बॉलीवूड अभिनेत्री अमीषा पटेलच्या कामाबद्दल बोलायचे झाल्यास तिने ‘कहो ना प्यार है’ या चित्रपटातून सिनेविश्वात पदार्पण केलं. त्यानंतर ती ‘बदरी’ या तेलगू चित्रपटात दिसली. पुढे तिने बॉलीवूडमध्ये ‘गदर एक प्रेम कथा’ चित्रपटात मुख्य अभिनेत्रीचं काम केलं. बॉलीवूडमध्ये आल्याबरोबर अमीषाचे सलग दोन चित्रपट सुपरहिट ठरले. त्यानंतर ‘क्रांती’, ‘क्या यही प्यार है’, ‘आप मुझे अच्छे लगने लगे’, ‘ये है जलवा’ अशा अनेक चित्रपटांमध्ये तिने काम केलं आहे.
