Animal Box office collection Day 11: रणबीर कपूरच्या ‘अ‍ॅनिमल’ चित्रपटाने बॉक्स ऑफिसवर धुमाकूळ घातला आहे. चित्रपट पाहण्यासाठी प्रेक्षक सिनेमागृहांबाहेर गर्दी करत आहेत. चित्रपटाला प्रेक्षकांचा उस्फूर्त प्रतिसाद मिळत आहे. चित्रपटाने प्रदर्शनाच्या पहिल्या दिवशी जगभरात १०० कोटींचा तर दुसऱ्या दिवशी २०० कोटींचा टप्पा ओलांडला. या चित्रपटाचे जगभरातील एकूण कलेक्शन हे ६०० कोटींच्या घरात गेले असून लवकरच ७०० कोटींचा टप्पाही हा चित्रपट पार करणार असल्याची शक्यता वर्तवली जात होती.
नुकत्याच हाती आलेल्या माहितीनुसार ‘अ‍ॅनिमल’ने ७०० कोटींचाही टप्पा पार केला आहे. या चित्रपटाच्या सोशल मीडिया अकाऊंटवर नुकतंच एक पोस्ट शेअर करण्यात आली. या पोस्टमध्ये लिहिण्यात आलं आहे की, “अ‍ॅनिमलने पुन्हा नव्याने इतिहास लिहिला आहे.” रणबीरचा ‘अ‍ॅनिमल’मधील लुकचा फोटो शेअर करत चित्रपटाच्या ११ दिवसांचे कलेक्शन शेअर केले आहे.
आणखी वाचा : “चिंटू आज हवा होता…”; ‘अ‍ॅनिमल’मधील रणबीरच्या कामाचं शक्ति कपूर यांनी केलं कौतुक; म्हणाले, “त्याचा मुलगा…”
११ व्या दिवशी ‘अ‍ॅनिमल’ने ७०० कोटींचा टप्पा पार केला असून या चित्रपटाने एकूण ७३७.९८ कोटींची कमाई केली आहे. यावर्षीचा सर्वाधिक कमाई करणारा ‘अ‍ॅनिमल’ हा तिसरा चित्रपट ठरला आहे. या चित्रपटाने ‘गदर २’ आणि किंग खानच्या ‘जवान’चेही बरेच रेकॉर्ड मोडीत काढले आहेत. अशीच या चित्रपटाची कमाई आणखी आठवडाभर सुरू राहिली तर नक्कीच हा चित्रपट १००० कोटींची कमाई करू शकतो असं ट्रेड एक्स्पर्टचं म्हणणं आहे.
‘अ‍ॅनिमल’मध्ये रणबीर कपूरसह बॉबी देओल, रश्मिका मंदान्ना, अनिल कपूर, तृप्ती डिमरी यांच्या प्रमुख भूमिका आहेत. एकूणच या चित्रपटाबद्दल सेलिब्रिटीजमध्येसुद्धा दोन वेगळे मतप्रवाह पाहायला मिळत आहे. तरीही चित्रपटाची बॉक्स ऑफिसवर यशस्वी घोडदौड सुरू आहे. लवकरच संदीप रेड्डी वांगा हे याच्या सीक्वलवर म्हणजेच ‘अ‍ॅनिमल पार्क’वर काम सुरू करणार आहेत.
