अनुपम खेर आणि किरण खेर हे बॉलीवूडमधील सर्वात क्यूट जोडप्यांपैकी एक मानले जाते. दोघांनी १९८५ मध्ये लग्नगाठ बांधली. नुकतंच अनुपम खेर यांनी एका मुलाखतीत किरण खेर यांच्याबरोबरच्या पहिल्या भेटीचा एक रंजक किस्सा शेअर केला आहे.
एएनआयशी बोलताना अनुपम खेर यांनी किरण खेरसोबतची त्यांची पहिली भेट आणि त्याची लव्ह स्टोरी सांगितली आहे. अनुपम खेर म्हणाले, किरण आधीच एक स्टार होती, त्या वेळी ती थिएटर करत होती, चित्रपटांमध्ये काम करत होती. ती एमएच्या पहिल्या वर्गात होती. मी तिला चंदीगडमध्ये भेटलो. मी खेड्यातील एक साधा मुलगा होतो. साहजिकच आमच्यात कोणताही संबंध नव्हता.
किरण खेरबद्दल बोलताना अनुपम खेर पुढे म्हणाले, ‘तिचे तेव्हा लग्न झाले होते आणि तिच्याकडे सिकंदर (खेर) होता. किरण आणि मी चांगले मित्र होतो आणि आम्ही एकत्र थिएटरही करायचो. नंतर तिच्या वैवाहिक जीवनात अडचणी आल्या तेव्हा तिने मला सांगितले की, तिच्या नवऱ्याने तिची फसवणूक केली. हळूहळू परिस्थिती बदलू लागली. आजही आम्ही नवरा-बायको असलो तरी चांगले मित्र असल्याचे अनुपम खेर यांनी स्पष्ट केलं.
अनुपम खेर यांना सगळ्यात जास्त कशाची भीती वाटते, असाही प्रश्न विचारण्यात आला होता. त्याला उत्तर देताना अनुपम खेर म्हणाले, माझी स्मरणशक्ती गमावण्याची मला सगळ्यात जास्त भीती आहे. जर तुमच्याकडे स्मृती नसेल तर तुमच्याकडे काहीही नाही. दिलीप कुमार यांची स्मरणशक्ती गेली. ते एक अद्भुत व्यक्ती होते. एक अद्भुत कथा सांगणारा, अनेक गोष्टींचे अफाट ज्ञान असलेला माणूस होता, असेही अनुपम खेर म्हणाले.
हेही वाचा- “एक गेला म्हणून काय झाले, दोन-चार जण…,” जिया खान आत्महत्या प्रकरणावर राखी सावंतची प्रतिक्रिया
अनुपम खेर यांच्या वर्कफ्रंटबद्दल बोलायचे झाले तर ते बॉलीवूडमधील सर्वात व्यस्त अभिनेत्यांपैकी एक आहेत. सध्या ते ‘वॅक्सिन वॉर आयबी ७१’, ‘इमर्जन्सी’, ‘कागज २’, ‘मेट्रो इन डिनो’ आणि ‘सिग्नेचर इन हिज किटी’ चित्रपटांच्या शूटिंगमध्ये व्यस्त आहेत.
