बॉलीवूड अभिनेता आरबाज खानने गेल्यावर्षी दुसऱ्यांदा लग्नगाठ बांधली. प्रसिद्ध मेकअप आर्टिस्ट शूरा खानबरोबर अरबाज लग्नबंधनात अडकला. आरबाज व शूराच्या लग्नाचे फोटो सोशल मीडियावर मोठ्या प्रमाणात व्हायरल झाले होते. दरम्यान, शूराच्या वाढदिवसानिमित्त आरबाजने रोमँटिक पोस्ट शेअर केली आहे.
आपल्या इन्स्टाग्रामवर आरबाजने शूराबरोबरचा एक फोटो शेअर केला आहे. हा फोटो शेअर करत त्याने लिहिले, “माझी प्रिय शूरा, तुला वाढदिवसाच्या खूप खूप शुभेच्छा. तुझ्याइतके मला कोणीही हसवत नाही. मला म्हातारपणापर्यंत तुझ्याबरोबर राहायचे आहे. आपण एकत्र येणे ही माझ्या बाबतीत घडलेली सर्वात चांगली गोष्ट आहे.”
आरबाजने पुढे लिहिलं, “जेव्हा मी पहिल्यांदा तुझ्यासोबत डेटला गेलो होतो, तेव्हाच मला जाणवलं होतं की, मी माझं संपूर्ण आयुष्य तुझ्यासोबत घालवणार आहे. तू नेहमी तुझ्या सौंदर्याने आणि दयाळूपणाने मला आश्चर्यचकित करते. जेव्हा मी तुझ्यासाठी कबूल है म्हणालो, हे शब्द माझ्या आयुष्यातील सगळ्यात चांगले शब्द होते, जे मी तुझ्यासाठी उच्चारले होते. माझं तुझ्यावर प्रेम आहे.” आरबाजची ही पोस्ट सोशल मीडियावर मोठ्या प्रमाणात व्हायरल होत आहे. अनेक चाहत्यांनी या पोस्टवर कमेंट करत शूराला वाढदिवसाच्या शुभेच्छा दिल्या आहेत.
गेल्या वर्षी २४ डिसेंबरला आरबाज आणि शूराचा लग्नसोहळा पार पडला. आरबाज खानची बहीण अर्पिता खानच्या घरी या लग्नसोहळ्याचे आयोजन करण्यात आले होते. या लग्नाला रवीना टंडन, रितेश देशमुख, जेनेलिया डिसूझा, फराह खान, साजिद खान यांच्यासह अनेक कलाकारांनी हजेरी लावली होती.
