अभिनेता श्रेयस तळपदेला गुरुवारी हृदयविकाराचा झटका आला आहे. श्रेयस सध्या रुग्णालयात असून त्याच्यावर उपचार सुरू आहेत. बॉबी देओलने श्रेयसच्या प्रकृतीविषयी माहिती दिली आहे. बॉबी व श्रेयस जवळचे मित्र आहेत. श्रेयसच्या हृदयाने १० मिनिटं काम करणं थांबवलं होतं, अशी माहिती बॉबीने दिली आहे.
‘बॉलीवूड हंगामा’शी बोलताना बॉबी म्हणाला, “मी श्रेयसची पत्नी दीप्ती तळपदेशी बोललो. ती खूप अस्वस्थ झाली होती. श्रेयसचं हृदय सुमारे १० मिनिटं बंद पडलं होतं. सध्या त्याच्यावर उपचार सुरू असून अँजिओप्लास्टी करण्यात आली आहे. त्यामुळे तो लवकर बरा होवो हीच सर्वांनी प्रार्थना करा.”
Shreyas Talpade : अभिनेता श्रेयस तळपदेला हृदयविकाराचा झटका, रुग्णालयात करण्यात आलं दाखल
गुरुवारी रात्री श्रेयसने बरं वाटत नसल्याचं दीप्तीला सांगितलं. नंतर दीप्ती त्याला रुग्णालयात नेत असतानाच त्याला चक्कर आली. त्याने दिवसभर ‘वेलकम टू द जंगल’ या चित्रपटाचं शूटिंग केलं होतं आणि तो ठणठणीत होता. तो सेटवर सर्वांशी गप्पा मारत होता, त्याने काही अ‍ॅक्शन असलेले सीक्वेन्सही शूट केले होते. शूट संपल्यानंतर तो घरी परत गेला आणि त्याची प्रकृती खालावली, अशी माहिती समोर आली आहे.
श्रेयसच्या प्रकृतीबाबत गुरुवारी रात्रीच रुग्णालयाकडूनही माहिती देण्यात आली होती. ‘आज रात्री १० वाजता श्रेयस तळपदेची अँजिओप्लास्टी करण्यात आली. आता श्रेयसच्या प्रकृतीत सुधारणा आहे. तो दिवसभर शूटिंग करत होता, त्यावेळी त्याला काही झालं नाही पण घरी आल्यावर त्याला अस्वस्थता जाणवू लागली. नंतर त्याची पत्नी दीप्ती त्याला तातडीने रुग्णालयात घेऊन आली होती,’ असं त्यांनी सांगितलं होतं.
