बॉलिवूडचा दबंग अभिनेता सलमान खान याच्या वाटेला सहसा कुणी जात नाही, आणि जर कुणी गेलं तर मग त्याचं काही खरं नाही हे असे अनुभव चित्रपटसृष्टीत खूप लोकांना आले आहेत. विवेक ओबेरॉयपासून अरिजित सिंगपर्यंत कित्येकांनी हा अनुभव घेतला आहे. विवेक ओबेरॉयचं प्रकरण तर तेव्हा चांगलंच तापलं होतं, त्यानंतर विवेकने बऱ्याचदा माफी मागूनही सलमानने त्याला माफ केले नाही.
आता अशाच एका अभिनेत्याने सलमान खानची माफी मागितली आहे. तो अभिनेता म्हणजे कमाल आर खान. केआरके गेले काही दिवस सोशल ट्विटरवर पुन्हा सक्रिय झाला आहे. तुरुंगातून बाहेर आल्यावरही तो अजूनही बॉलिवूडवर डूक धरून बसला आहे. बॉलिवूडच्या प्रत्येक चित्रपटाचं तो समीक्षण करून त्यांची पोलखोल करत आहे. मध्यंतरी जेव्हा त्याला अटक झाली होती तेव्हा त्याने आपल्या अटकेमागे सलमान खानचा हात असल्याचं सांगितलं होतं. त्यावरूनच त्याने आता सलमानची माफी मागितली आहे.
आणखी वाचा : कल्याण, डोंबिवलीतील नाट्यगृहांची अवस्था पाहून प्रशांत दामलेंनी व्यक्त केली खंत, म्हणाले….
याबद्दल ट्वीट करत केआरके म्हणाला, “मला सगळ्या पत्रकारांना सांगायचं आहे की माझ्या अटकेमागे सलमान खान यांचा हात नव्हता. भाईजान सलमान खान माझा गैरसमज झाला त्याबद्दल मी तुमची क्षमा मागतो. मी तुम्हाला दुखावलं असेल तर त्याबद्दल मी माफी मागतो. यापुढे मी तुमच्या कोणत्याही चित्रपटाचं समीक्षण करणार नाही.”
असं बघायला गेलं तर याआधीदेखील केआरकेने समीक्षण करणार नाही असं बऱ्याचदा सांगितलं होतं. तुरुंगातून सुटका होताच तो या क्षेत्रातून निवृत्ती घेणार असल्याचंही त्याने ट्वीट करून सांगितलं होतं, पण तरी आजही तो बॉलिवूडच्या प्रत्येक चित्रपटाचं समीक्षण करत आहे. केआरकेने ‘देशद्रोही’, ‘एक व्हिलन’सारख्या चित्रपटात अभिनय केला आहे.
