Allu Arjun Arrested : अभिनेता अल्लू अर्जुनचा ‘पुष्पा 2’ चित्रपट सिनेमागृहांमध्ये धुमाकूळ घालत आहे. पण याच चित्रपटामुळे तो अडचणीत सापडला आहे. अल्लू अर्जुनला आज त्याच्या हैदराबाद येथील घरातून अटक करण्यात आली आहे. ‘पुष्पा 2’ चित्रपटाच्या प्रिमियरवेळी झालेल्या चेंगराचेंगरीत एका महिलेचा मृत्यू झाला होता; याप्रकरणी अभिनेत्याला आज अटक झाली. त्याच्या अटकेवर अभिनेता वरुण धवनने प्रतिक्रिया दिली आहे.
अल्लू अर्जुनच्या अटकेनंतर खळबळ उडाली आहे. ४ डिसेंबरला हैदराबादमध्ये झालेल्या प्रिमियर शोमध्ये चेंगराचेंगरी झाली होती. या घटनेत ३९ वर्षीय महिलेचा मृत्यू झाला, तर तिचा मुलगा गंभीर जखमी झाला असून त्याच्यावर उपचार सुरू आहेत. याप्रकरणी तक्रार दाखल करण्यात आली होती. त्यानंतर अल्लू अर्जुनने या महिलेच्या कुटुंबाला २५ लाख रुपयांची मदत करण्याचे आश्वासन दिले होते. मात्र आज अल्लू अर्जुनला पोलिसांनी अटक केली आहे.
हेही वाचा – अल्लू अर्जुनने पत्नीला किस केलं अन् हसत हसत पोलिसांच्या गाडीत जाऊन बसला; अभिनेत्याचा अटकेआधीचा Video Viral
े
या घटनेसाठी अल्लू अर्जुनला दोषी ठरवणं चुकीचं आहे, असं मत वरुण धवनने व्यक्त केलं आहे. अल्लू अर्जुनच्या अटकेबाबत समजताच वरुण धवन म्हणाला, “जी घटना घडली ती खूप दुर्दैवी आहे. त्याबद्दल मी शोक व्यक्त करतो. पण त्याचवेळी या घटनेचा दोष फक्त एका व्यक्तीला देऊ शकत नाही.”
पोलीस अटक करण्यासाठी आल्यावर अल्लू अर्जुनने त्याचा नाश्ता संपवला, त्यानंतर पत्नी स्नेहा रेड्डीशी बोलल्यावर तो पोलिसांबरोबर गेला. अभिनेता हसत हसत पोलिसांच्या गाडीत बसतानाचे व्हिडीओ समोर आले आहेत. दरम्यान, अल्लू अर्जुनला अटक करून पोलिसांनी चिक्कडपल्ली पोलीस स्थानकात नेलं आहे. महिलेच्या मृत्यूची नोंद याच पोलीस स्टेशनमध्ये करण्यात आली आहे.
