‘नो एण्ट्री’, ‘अपना सपना मनी मनी’, ‘गोलमाल रिटर्न्स’ या चित्रपटांमध्ये अभिनेत्री सेलिना जेटलीने महत्त्वाच्या भूमिका साकारल्या आहेत. अनेक वर्ष बॉलीवूडमध्ये काम केल्यावर ही अभिनेत्रीने अचानक चित्रपटसृष्टीपासून दूर झाली. करिअरच्या सुरुवातीला तिने फॅशन इंडस्ट्रीत काम केले. सेलिनाने तिच्या या संपूर्ण प्रवासाबाबत माहिती देण्यासाठी नुकतीच एक इन्स्टाग्राम पोस्ट शेअर केली आहे.
सेलिना जेटली या पोस्टमध्ये म्हणते, “मी अगदी लहान वयात फॅशन इंडस्ट्रीमध्ये प्रवेश केला. कोलकाता येथून सुरु झालेला माझा प्रवास सोपा नव्हता. आयुष्यात खूप संघर्ष करावा लागला. किशोरवयात सुरुवातीला अभ्यासाचे प्रचंड दडपण होते. तेव्हा मला एंडोमेट्रिओसिस हा अत्यंत गंभीर आजार झाला होता. चेहऱ्यावर मुरुमे यायची, मासिक पाळी आल्यावर शरीरातील रक्त कमी होत असल्याने मला प्रत्येक महिन्यात मला रुग्णालयात दाखल व्हावे लागायचे. ते दिवस माझ्यासाठी अत्यंत कठीण होते.”
सेलिना पुढे म्हणते, “माझे इतर मित्र-मैत्रिणी जेव्हा सुट्ट्यांचा आनंद घ्यायचे तेव्हा मी कोलकात्यात शूट आणि रॅम्प वॉक शो करायचे. अनेकवेळा कमी पैशांत काम केले आहे. प्रचंड मेहनत करूनही अनेकांनी माझे पैसे दिले नाहीत.”
हेही वाचा : शाहरुख खानचा ‘जवान’ पहिल्याच दिवशी कमावणार ‘इतके’ कोटी; प्रसिद्ध अभिनेत्याची भविष्यवाणी
“मी खूप जास्त गोरी आहे, खूप बारीक आहे, पुरेशी उंच नाही किंवा काही लोक बोलायचे खूप उंच आहेस अशा सगळ्या गोष्टी मी सहन केल्या. सतत टीका आणि नकार मिळत होता. अपमानास्पद गोष्टी ऐकाव्या लागल्या पण, यामुळे मी अधिक खंबीर झाले आणि आयुष्यात पुढे जात राहिले. निर्धार, शक्ती, समर्पण आणि संघर्ष यामुळे भविष्यात जागतिक पातळीवर देशाचे प्रतिनिधीत्व करण्याची संधी मला मिळाली.” असे लिहित सेलिनाने तिचा संपूर्ण प्रवास इन्स्टाग्रामवर शेअर केला आहे.
