अभिनेत्री कल्की कोचलिन दोन वर्षांपूर्वी आई झाली. तिनं एका गोंडस मुलीला जन्म दिला. पण लग्न न होताच आई झाल्यामुळे कल्कीला खूप ट्रोल केलं गेलं. यावर आता अभिनेत्रीनं मौन सोडलं आहे. अलीकडेच झालेल्या मुलाखतीमधून अभिनेत्रीनं ट्रोलर्सना चांगलंच उत्तर दिलं आहे.
‘मॅशबेल इंडिया’ला दिलेल्या मुलाखतीमध्ये कल्की कोचलिन म्हणाली की, “माझं पहिलं लग्न दिग्दर्शक अनुराग कश्यपबरोबर झालं होतं. आता जो माझा जोडीदार गाया हर्षबर्ग आहे, त्याला लग्न करण्यात अजिबात रस नाहीये. मी आधीच घटस्फोटित आहे आणि त्यामुळेच मलाही लग्नात रस नाहीये. त्यामुळे मी आणि हर्षबर्गने खूप विचार केल्यानंतर लग्न न करण्याचा निर्णय घेतला. असे असले तरी आम्ही एकत्र राहतो.”
कल्की आपल्या जोडीदारबरोबर गोव्यात राहत आहे. ‘ई-टाइम्स’ला दिलेल्या मुलाखतीत ती म्हणाली होती की, “गोव्यात राहण्याचे कारण मुलगी आहे. कारण मला असं वाटतं की, माझ्या मुलीचं बालपण चारी बाजूला हिरवळ असलेल्या ठिकाणी जावं. मी पहिल्यांदा हर्षबर्गला इस्रायलमध्ये भेटले होते.”
हेही वाचा – नितीन देसाई यांनी लूक का बदलला होता? त्यांनीच सांगितलेलं दाढी वाढविण्यामागचं कारण
दरम्यान कल्कीच्या कामाबद्दल बोलायचं झालं तर, लवकरच ती ‘मेड इन हेवन सीझन २’मध्ये झळकणार आहे. शिवाय कल्की दीप्ति नवलच्या ‘गोल्डफिश’ चित्रपटामध्येही दिसणार आहे. २५ ऑगस्टला हा चित्रपट प्रदर्शित होणार असून यामध्ये मायलेकीची कहाणी दाखवण्यात आली आहे.
