बॉलीवूडची अभिनेत्री कंगना राणौत तिच्या वक्तव्यांमुळे नेहमी चर्चेत असते. कंगना तिच्या अभिनयाबरोबरच स्पष्टवक्तेपणासाठी ओळखली जाते. तिच्या याच स्पष्टवक्तेपणामुळे बॉलीवूडमध्ये तिचे कोणाशी पटत नाही, असं म्हणतात. चित्रपट निर्माता करण जोहर आणि कंगनामधील वाद जगजाहीर आहे. नुकत्याच एका मुलाखतीत कंगनाने आपण करण जोहरशी का भांडतो, यामागचा खुलासा केला आहे.
हेही वाचा- Video : “पर्स आहे की बादली?” नेटकऱ्यांनी उडवली अनन्या पांडेची खिल्ली; म्हणाले, “दाल फ्राय…”
कंगना नेहमी बॉलीवूडमध्ये सुरू असलेल्या घराणेशाहीवर आपलं मत मांडताना दिसते. कंगना जेव्हा जेव्हा या विषयावर बोलते तेव्हा तेव्हा तिने करण जोहरला लक्ष्य केले आहे. कंगनाने तर करण जोहरला घराणेशाहीचा राजा म्हटले आहे. स्टार्स किड्स लाँच करण्याची जबाबदारी करणने उचलली आहे, असे त्याचे मत आहे. दरम्यान, नुकत्याच झालेल्या एका मुलाखतीदरम्यान कंगनाला विचारण्यात आले की, ती करण जोहरशी का भांडते? यावर कंगनाने आपले मत उघडपणे मांडले.
कंगना राणौतच्या म्हणण्यानुसार ती कोणा एका व्यक्तीविरोधात बोलत नाही तर व्यवस्थेविरोधात बोलत असते. कंगनाचा असा विश्वास आहे की करण जोहर काही लोकांना विशेषाधिकार वाटतो. कंगनाचा विश्वास आहे की स्टार मुलांना कोणतेही कष्ट न करता सहज काम मिळते. ती फिल्मी बॅकग्राऊंडमधून येत नसल्याने तिला अनेक समस्यांना तोंड द्यावे लागले. कंगना म्हणाली, मला इंग्रजी कसं बोलावं हे माहिती नसल्यामुळे माझी खिल्लीही उडवली गेली. मला नेहमी दुय्यम दर्जाची वागणूक मिळाल्याचा आरोप कंगनाने केला आहे. तसेच मी एक लढाई लढत आहे आणि बरेच लोकदेखील या लढाईचा एक भाग आहेत, असेही कंगना म्हणाली.
कंगनाने बॉलीवूडमध्ये सुरू असलेल्या बॉयकॉट ट्रेण्डबद्दलही वक्व्य केले आहे. बॉयकॉटमुळे झालेल्या नुकसानावर कंगना म्हणाली की, देशातील लोकसंख्या लक्षणीय आहे, त्यामुळे अशा परिस्थितीत त्याचा फारसा परिणाम होणार नाही. करण जोहरने अनेक स्टार किड्स लाँच केले आहेत. त्यामुळे बॉलीवूडमधील घराणेशाहीवरून कंगना नेहमी करण जोहरला लक्ष्य करीत आली आहे.
