वडिलांच्या निधनानंतर ६ व्या दिवशी प्रियांका चोप्राने आईसाठी ठेवलेली पार्टी, मधू चोप्रा म्हणाल्या, “माझ्या मुलीनं…”

यावेळी मधू चोप्रा यांनी असे म्हटले, “त्यांचे (अशोक चोप्रा) १० जून रोजी निधन झाले आणि माझा वाढदिवस १६ जून रोजी आहे. मी ६० वर्षांची होणार होते आणि त्यामुळे प्रियांकानं माझ्यासाठी एक मोठी पार्टी आयोजित केली होती. अशोक चोप्रा यांच्या आजारामुळे संपूर्ण कुटुंब तिथे आधीच उपस्थित होते. त्यांच्या निधनानंतर आम्ही सर्व जण दु:खात होतो; पण प्रियांका माझ्या वाढदिवसाची पार्टी करणार यावर ठाम होती आणि त्यामुळे तिनं सर्वांना तिथेच थांबण्यास सांगितलं. तसेच, ती सर्वांना ‘पप्पांनाही हेच हवं होतं’, असंही म्हणाली होती.”

पुढे मधू चोप्रा यांनी सांगितले, “प्रियांकाचं असं म्हणणं होतं की, तिच्या आईनं प्रत्येक क्षणाचा आनंद घ्यावा आणि म्हणूनच तिनं माझ्या वाढदिवसानिमित्त डीजे आणि संगीतासह एक पार्टी आयोजित केली. त्यावर कुटुंबातील इतर सदस्य खूश नव्हते. त्यावरून ते माझ्याबद्दल ‘हिच्याकडे पाहा. हिला पतीच्या मृत्यूबद्दल अजिबात दुःख नाही’, असं म्हणाले होते. तर दुसरीकडे मी विचार करीत होते की, माझ्या मुलीनं माझ्यासाठी हे सर्व केलं आहे आणि माझ्या मुलांनी माझ्यासाठी खूप कष्ट केले आहेत.”

त्यानंतर मधू चोप्रा म्हणाल्या, “हे सगळं पाहून माझ्या मनात हे चाललं होतं की, सर्व जण दुःखात होते; पण माझी मुलगी तिच्या वडिलांचा आदर करीत होती. त्याबद्दल ती सर्वांना म्हणाली होती की, मी केवळ पप्पांना जे हवं होतं, तेच करीत आहे. त्यामुळे तुम्हीही तेच केलं, तर बरं होईल”. दरम्यान, प्रियांका चोप्राचे वडील डॉ. अशोक चोप्रा यांचे कर्करोगामुळे २०१३ मध्ये निधन झाले. अशोक चोप्रा हे भारतीय सैन्यात डॉक्टर होते. वयाच्या ६२ व्या वर्षी त्यांनी अखेरचा श्वास घेतला.