यंदाचा ऑस्कर सोहळा अमेरिकेतील लॉस एंजेलिसमधील डॉल्बी थिएटरमध्ये आज (११ मार्च रोजी) पार पडला. या सोहळ्यातील ‘इन मेमोरिअम’ सेगमेंटमध्ये बॉलीवूडमधील मराठमोळे कलादिग्दर्शक दिवंगत नितीन देसाई यांना आदरांजली वाहण्यात आली. या सोहळ्यात उपस्थितांनी नितीन देसाईंचं स्मरण केलं. दिवंगत टिना टर्नर, मॅथ्यू पेरी आणि इतर अनेक जणांची नावं या यादीत होती. २०२३ मध्ये देसाई यांनी ५७ व्या वर्षी आत्महत्या केली होती.
नितीन देसाई यांनी संजय लीला भन्साळी यांच्याबरोबर काम केलं होतं. ‘हम दिल दे चुके सनम’ आणि ‘बाजीराव मस्तानी’ यांसारख्या अनेक सुपरहिट चित्रपटांचे सेट त्यांनी तयार केले होते. राजकुमार हिरानी, विधू विनोद चोप्रा आणि आशुतोष गोवारीकर यांसारख्या चित्रपट निर्मात्यांसमवेत त्यांनी काम केलं होतं. ‘वन्स अपॉन अ टाइम इन मुंबई’, ‘दोस्ताना’, ‘लगे रहो मुन्ना भाई’, ‘मुन्ना भाई एमबीबीएस’, ‘मिशन कश्मीर’, ‘जोश’ आणि ‘प्यार तो होना ही था’ या चित्रपटांचे ते कला दिग्दर्शक होते. आशुतोष गोवारीकर दिग्दर्शित ‘पानिपत’ हा २०१९ सालचा ऐतिहासिक चित्रपट नितीन देसाईंचा शेवटचा चित्रपट होता. हिंदी सिनेसृष्टीतील कलादिग्दर्शनाच्या क्षेत्रात नितीन देसाईंचं मोठं योगदान आहे.
Oscar 2024 : …अन् रेसलर जॉन सीना नग्नावस्थेत पोहोचला ऑस्करच्या मंचावर, पाहा व्हिडीओ
नितीन मुंबईजवळच्या कर्जत येथील त्यांच्या एनडी स्टुडिओमध्ये २ ऑगस्ट २०२३ रोजी मृतावस्थेत आढळले होते. त्यांनी गळफास घेऊन आत्महत्या केली होती. नितीन देसाईंवर मृत्यूपूर्वी तब्बल २४९ कोटींचं कर्ज होतं, ठराविक मुदतीसाठी घेतलेले कर्ज न फेडल्यामुळे नितीन देसाई यांच्या कर्जत चौक येथील एन. डी. स्टुडिओवर जप्तीच्या कारवाईचे संकट ओढावले होते. त्यानंतर देसाईंनी स्टुडिओतच गळफास घेत जीवन संपवलं.
