‘छावा’ चित्रपटाची अजूनही घोडदौड सुरुच, २३व्या दिवशी केली ‘इतकी’ कमाई; २०२५मधील ५०० कोटींहून अधिक कमवणारा ठरला पहिला चित्रपट

व्हॅलेंटाइन डे दिवशी १४ फेब्रुवारीला ‘छावा’ चित्रपट प्रदर्शित झाला होता. या चित्रपटात छत्रपती संभाजी महाराजांची भूमिका साकारणाऱ्या विकी कौशलने आपल्या दमदार अभिनयाने प्रेक्षकांची मनं जिंकली. अजूनही प्रेक्षक ‘छावा’ चित्रपट बघण्यासाठी चित्रपटगृहात गर्दी करताना दिसत आहेत. आता २३व्या दिवशीचं कलेक्शन समोर आलं आहे.

सॅकनिल्कच्या अहवालानुसार, ‘छावा’ चित्रपटाने २३व्या दिवशी भारतात १६.५ कोटींची कमाई केली आहे. त्यामुळे एकूण कमाईचा आकडा ५०० कोटी पलीकडे गेला आहे. आतापर्यंत ‘छावा’ चित्रपटाने भारतात ५०८.८ कोटींचा गल्ला जमवला आहे. विकी कौशलच्या आजवरच्या करिअरमध्ये सर्वाधिक कमाई करणारा ‘छावा’ चित्रपट आहे. विकीच्या ‘उरी: द सर्जिकल स्ट्राइक’ चित्रपटाने २४४.१४ कोटी, ‘राझी’ चित्रपटाने १२३.७४ कोटी, ‘सॅम बहादुर’ चित्रपटाने ९३.९५ कोटी आणि ‘जरा हटके जरा बचके’ चित्रपट ८८.३५ कोटी कमावले होते. विकीचा ‘छावा’ चित्रपट पहिला आहे, जो ५०० कोटींच्या क्लबमध्ये गेला आहे.

‘मॅडडॉक निर्मित ‘छावा’ चित्रपटात विकी कौशल व्यक्तिरिक्त रश्मिका मंदाना शंभूराजेंची पत्नी येसुबाईंच्या भूमिकेत झळकली आहे. तर अभिनेता अक्षय खन्ना औरंगजेबाच्या भूमिकेत पाहायला मिळत आहे. तसंच आशुतोष राणा, दिव्या दत्ता, विनीत सिंह, डायना पेंटी, प्रदीप रावत, नील भूपालम, महत्त्वाच्या भूमिकेत दिसत आहेत. याशिवाय बऱ्याच मराठी कलाकारांनी ‘छावा’ चित्रपटात जबरदस्त काम केलं आहे. अभिनेता संतोष जुवेकर, शुभंकर एकबोटे, आस्ताद काळे, सुव्रत जोशी, सारंग साठ्ये हे मराठी कलाकार चांगलेच भाव खाऊन गेले.